पयल्या दिसा ऑस्ट्रेलियेचो शेक

भांगरभूंय | प्रतिनिधी

संवसारीक टॅस्ट वस्तादपण सर्तीचे फायनलींच्या पयल्या दिसा ऑस्ट्रेलियेन भारताच्या बॉलरांची बॉलींग फोडून काडली. पयल्या अर्द वराच्या खेळांत भारताच्या बॉलरांनी आपलो शेक दवरलो. पूण, उपरांत ऑस्ट्रेलियेच्या बॅट्समनांनी मन मेकळ्यापणान बॅटींग केली.

ट्रेविस हेड आनी स्टिवन स्मिथ हे जोडयेन भारताच्या बॉलरांनी बॉलिंग फोडून काडटना नाबाद 251 धांवड्यांची भागिदारी केली. तांचे बॅटिंगे नेटार ऑस्ट्रेलियेन पयल्या दिसाचो खेळ सोंप मेरेन 3 विकेटी वगडावन 327 धांवड्यो केल्यात. हेड 146 आनी स्मिथ 95 धांवड्यांचेर खेळटा

ते आदीं रोहित शर्मान टॉस जिखून पयलीं फिल्डिंग करपाचो निर्णय घेतलो. ढगाळ वातावरण आनी पाचवी खेळपट्टी पळयली, जाल्यार ताचो हो निर्णय योग्य आसा अशें दिशिल्लें. पयल्या कांय ओव्हरींनी हो निर्णय योग्य दिसलो. बॉल बरे तरेन बावन्स जातालो. ताका लागून भारताचे बॉलर ऑस्ट्रेलियेचो डाव दोन सत्रांनी कुठलायतले अशें दिशिल्लें. सुरवातीक येस लेगीत मेळ्ळें. मोहम्मद सिराजान ओपनर उस्मान ख्वाजाक शुन्याचेर तंबूंत धाडलो. पूण, ते उपरांत डॅव्हिड वॉर्नरान चिवट खेळी केली. मार्नस लाबशेना वांगडा मेळून तो खेळपट्टीचेर तग धरून रावलो. अखेरेक वॉर्नर 60 बॉलांनी आठ चवक्यांचे मजतीन 43 धांवड्यो करून बाद जालो. शार्दुलाच्या बॉलाचेर विकेटकीपर भरतान ताची कॅच धरली. उपरांत लाबशेन 26 धांवड्यांचेर मोहम्मद शमीच्या बॉलाचेर बोल्ड जालो. ताका लागून ऑस्ट्रेलियेची स्थिती 3 बाद 76 अशी जाली. पूण, उपरांत ऑस्ट्रेलियेन मॅच आपले वटेन केली.

ट्रॅविस हेड बॅटिंगेक आयलो आनी ताणें आक्रमक बॅटिंग करपाक सुरवात केली. वेगान धांवड्यो करून ताणें पयलीं 60 बॉलांनी अर्द शेंकडो पुर्ण केलो. ते उपरांत हीच लय कायम दवरतना दरेक बॉलराची बॉलिंग फोडून काडली. ताणें 106 बॉलांनी शेंकडो पुर्ण केलो.

संवसारीक टॅस्ट वस्तादपण सर्तीचे फायनलींत शेंकडो मारपी तो पयलो बॅट्समन थारलो. ताका साथ दिवपी स्मिथान 145 बॉलांनी अर्द शेंकडो पुर्ण केलो. ते उपरांत लेगीत दोगांयनी जलद रितीन धांवड्यो करप चालूच दवरल्यो.

पयल्या दिसाचो खेळ सोंपलो त्या वेळार हेड 156 बॉलांनी 22 चवके आनी एका सक्याचे मजतीन 146 धांवड्यांचेर खेळटा जाल्यार स्मिथ 227 बॉलांनी 14 चवक्यांचे मजतीन 95 धांवड्यांचेर खेळटा. दोगांयनी अजून मेरेन 251 धांवड्यांची नाबाद भागिदारी केल्या.