पयल्या टप्प्याचें आयज मतदान: १९ राज्यांतले १०२ मतदारसंघ सज्ज

भांगरभूंय | प्रतिनिधी

नवी दिल्ली, खबरां संस्था: लोकसभा वेंचणुकेंतल्या पयल्या टप्प्यांत देशांतलीं १९ राज्यां आनी २ केंद्रशासीत प्रदेशांतल्या १०२ लोकसभा मतदारसंघांत मतदान जाता. नक्षली भागा सयत संवेदनशील मतदारसंघांनी खर सुरक्षा वेवस्था तैनात केल्या. पयल्या टप्प्यांत १६.६३ कोटी मतदार १.८७ लाख मतदान केंद्रांचेर मतदान करतले. तशेंच १८ लाख कर्मचारी मतदानप्रक्रियेचो कारभार सांबाळटले.
ह्या टप्प्यांत १३४ बायलां सयत १,६२५ उमेदवार वेंचणुकेक देंवल्यांत. वेंचणूक शांतिकायेन जावची देखून केंद्रीय वेंचणूक आयोगान बरीच मेहनत घेतल्या. मतदारांक मतदाना वेळार कसलोच त्रास जावचो न्हय हाचीय जतनाय घेतल्या.

१९ राज्यांनी १०२ मतदारसंघांत नेटान तयारी

• पयल्या टप्प्यांत देशभरांत १०२ मतदारसंघां मदल्या ७३ उक्त्या गटांतल्या जाल्यार अनुसूचिीत जातीं खातीर ११ आनी अनुसूचीत जमातीं खातीर १८ मतदारसंघ राखीव आसात.
• अरुणाचल आनी सिक्कीमांत ९२ विधानसभा मतदारसंघां खातीरूय मतदान जातलें.
• मतदान सकाळीं ७ ते सांजेवेळार ६ वरां मेरेन जातलें.
• पयल्या टप्प्यांतल्या मतदारांत ८.४ कोटी दादले, ८.२३ कोटी बायलो आनी ११ हजार ३७१ तृतीयपंथीय आसात.
• ३५.६७ लाख पयले मतदार आसात. २०-२९ पिरायेचे ३.५१ कोटी युवा मतदार आसात.
• ४१ हेलिकॉप्टर, ८४ विशेश गाडयो आनी सुमार १ लाख वाहनां वेंचणूक आनी सुरक्षा कर्मचार्‍यां खातीर तैनात केल्यांत.