पयले टॅस्टींत ऑस्ट्रेलियेक 164 धांवड्यांनी जैत

भांगरभूंय | प्रतिनिधी

खबरां संस्था
पर्थः  पयलें क्रिकेट टॅस्ट मॅचींत ऑस्ट्रेलियेन वेस्ट इंडिजाक 164 धांवड्यांनी हारयलें. 499 धांवड्यांचो फाटलाव करतना  वेस्ट इंडिज निमाण्या पांचव्या दिसा फकत 333 धांवड्यो करपाक शकलो. 3 बाद 192 धांवड्या वयल्यान  तांणी सुरू केलो. खेळाच्या चवथ्या दिसाच्या स्कोरांत ते फकत 141 धांवड्यांची भर घालपाक शकले आनी बाकीच्यो 7 विकेटी तांणी वोगडायल्यो. ऑस्ट्रेलियेच्या नाथन लायनात दुसऱ्या डावांत 6 विकेटी घेतल्यो.
पर्थ
पयल्या डावांत 204 आनी दुसऱ्या डावांत नाबाद 104 धावड्यो करपी ऑस्ट्रेलियेचो लाबुशेन मॅन ऑफ दी मॅच थारलो. दोन टॅस्ट मॅचींचे हे माळेंत ऑस्ट्रेलियेन 1ृ0 अशी आघाडी घेतल्या. दुसरी टॅस्ट मॅच 8 डिसेंबराक एडिलेडांत जातली. खेळाच्या पांचव्या दिसा वेस्ट इंडिजाक 92 ओव्हरींत 306 धांवड्याची गरज आशिल्ली. कॅप्टन क्रॅग ब्रॅथवेट (101) आनी कायल मेयर्सान (0) पांचव्या दिसाचो खेळ फुडें सुरू केलो. 9 धांवड्याची भर घालून ब्रॅथवेट 110 आनी मेयर्स 10 धांवड्यो करून आवट जाले. तांका नाथन लायनात आवट केलें. रोस्टन चेज 55 आनी अल्जारी जोसेपान 43 धांवड्यो करून झूंज दिलें. मात ते आपल्याक पंगडाक जैत मेळोवन दिवपाक शकले नात. तेज नारायण चंद्रपॉल (43), शमार ब्रूक्स (11), जर्मेन ब्लॅकवूड (24) जेसन होल्डर (3) जोशुआ डिसिल्वा (12) जेडन सील्स (5) हांची खेळी पंगडाची हार वाटावपाक शकली ना.
नाथल लायनात 6, ट्रेवीस हेड हाणे 2, मिचेल स्टार्क, पॅट कमिंसन हांणी दरेकी एक विकेट घेतली. लायनात पयल्या डावांत 2 विकेटी घेतिल्ल्यो. अशे तरेह हे टॅस्ट मॅचींत ताणे 8 विकेटी मेळयल्यो. एक टॅस्ट मॅचींत  पयल्या डावांत दोट्टी शेकडो (204) आनी दुसऱ्या डावांत शेंकडो (नाबाद 104) करपी लाबुशेन संवसारांतलो 8वो बॅट्समन थारलो. हे वेळेरेंत भारताच्या सुनील गावस्कार हाचोय आसपाव आसा.