पयले घरकान्नीचो खून केल्ल्या प्रकरणांत आरोपीक जल्मठेप

भांगरभूंय | प्रतिनिधी

दुसरे घरकान्नीचोय खून केल्ल्यान भोगता जल्मठेप

पणजी: दुसरे घरकान्नीचो खून केल्ल्या प्रकरणांत जल्मठेपेची ख्यास्त भोगत आशिल्लो आरोपी अमीत कुमार दास हाका पयल्या घरकान्नीच्या खून प्रकरणांतूय न्यायालयान जल्मठेपेची ख्यास्त दिल्या. तशेंच एक लाख रुपयांचो दंड दिला. दंड भरलो ना जाल्यार तीन वर्सांची बंदखण आनी हेर ख्यास्त दिल्या. हे विशींचो निवाडो पणजेंतल्या उत्तर गोंय प्रधान जिल्हो आनी सत्र न्यायाधीश शैरीन पॉल हांणी दिलो.

ह्या प्रकरणांत हणजूण पुलिसांनी 1 एप्रील 2016 दिसा खुनाचो गुन्यांव दाखल केलो. ते प्रमाण, हणजूण पुलिसांनी 2 फेब्रुवारी 2016 दिसा दर्यादेगेर बायलेची कूड सांपडिल्ली. तेन्नाचे उपनिरिक्षक विजयनाथ कवळेंकार हांणी पंचनामो करून अनैसर्गीक मरणाची नोंद केल्ली. वळख पटूंक नाशिल्ल्यान कूड गोमॅकॉच्या मड्या कुडींत दवरिल्ली.

ह्याच वेळार दिवचलचे तेन्नाचे निरिक्षक नारायण चिमुलकार हांणी हणजूणें पुलिसां कडेन संपर्क सादून बाराजण कुडचिरें दिवचल हांगा हेलन सरकार हिच्या खून प्रकरणांत अटक केल्लो तिचो घरकार अमीत कुमार दास हाणें पयली घरकान्न पुनम उर्फ मोनीदीपा दास (30) हिचो हणजूणें दर्यादेगेर गळो अंदून आनी उदकांत बुडोवन खून केल्ल्याची कबुली दिल्ल्याची म्हायती दिली. तशेंच हे विशीं चिमुलकार हांणी हणजूण पुलिशेंत कागाळ दाखल केली. पुलिसांनी पुनमाच्या खून प्रकरणांत अमीता आड गुन्यांव दाखल केला. उपरांत तपासपूर्ण करून जुलय 2016 वर्सा उत्तर गोंय जिल्हो आनी सत्र न्यायालयांत आरोपपत्र दाखल केलें.

उपरांत 30 सप्टेंबर 2016 दिसा न्यायालयान आरोपी अमीत कुमार दास हाची पयली घरकान्न पुनम उर्फ मोनीदीपा दास हिच्या खून प्रकरणांत आरोप निश्चीत करून खटलो सुरू केलो. ह्या प्रकरणांत पयली तेन्नाचे सरकारी वकील पुनम भरणे, दर्शन गांवस जाल्यार आतां अनुराधा तळावलीकार हांणी युक्तिवाद करून आरोपी अमीत कुमार दास हाचे आड सबळ पुरावे सादर केले.

हाची दखल घेवन पणजेंतल्या उत्तर गोंय जिल्हो आनी सत्र न्यायालयान दास हाका पयल्या घरकान्नीच्या खून प्रकरणांत दोशी थारायलो. उपरांत न्यायालयांत ख्यास्तीचेर सुनावणी जाली तेन्ना आरोपीन 2016 वर्सा बाराजण, कुडचिरें दिवचल हांगा दुसरी घरकान्न हेलन सरकार (31) हिचो गळो अंदून खून केल्ल्या प्रकरणांत जल्मठेपेची ख्यास्त भोगत आशिल्ल्याची म्हायती दिवन ताका ह्या प्रकरणांत जल्मठेप दिवपाचो युक्तिवाद सरकारी वकील अनुराधा तळावलीकार हांणी केलो.

आरोपीची सान पिरायेची चली एकलीच आसून ती आश्रमांत रावत आशिल्ल्यान आरोपीक उण्यांत उणी ख्यास्त दिवपाची मागणी ताच्या वकिलान केली. ह्या प्रकरणांत न्यायालयान दोनूय पक्षाची बाजू आयकून घेतले उपरांत आरोपी अमीत कुमार दास हाका ताची पयली घरकान्न पुनम उर्फ मोनीदीपा दास हिच्या खून प्रकरणांत जल्मठेपेची ख्यास्त दिल्या. तशेंच 1 लाख रुपया दंड. हो दंड भरलो ना जाल्यार आनीक तीन वर्सां बंदखण. दंड भरलो जाल्यार तातूंतले 50 हजार रुपया पयली घरकान्न पुनमाचे चलयेक दिवपाचो निवाडो दिलो.

बाराजण कुडचिरे दिवचल हांगा आपली दुसरी घरकान्न हेलन सरकार हिचो गळो अंदून खून केल्ल्या प्रकरणांत उत्तर गोंय प्रधान आनी सत्र न्यायालयान आरोपी अमीत कुमार दास (अस्तंत बंगाल) हाका जल्मठेप आनी 1.10 लाख रुपयांचो दंड अशी ख्यास्त दिली. हो खून 22 मार्च 2016 दिसा घडिल्लो. बापायन आवयचो गळो अंदून खून केले उपरांत कूड व्हरता आसतना पांच वर्सांचे चलयेन पळयिल्ल्यान खुनाक वाचा फुटली. चलयेनूच हो प्रकार पळयिल्ल्यान तिची साक्ष म्हत्वाची थारली.