भांगरभूंय | प्रतिनिधी
पेडणें: पत्रादेवी तपासणी नाक्या वयल्यान गोंयांतल्यान महाराष्ट्रांत वचपी दोन ट्रकांतल्यान वट्ट वाहनां सयत 40 लाखांचो सोरो पेडणें अबकारी विभागाच्या अधिकाऱ्यांनी धरलो.
पत्रादेवी अबकारी तपासणी नाको हुपून एक ट्रक मडगांव मार्गान पुण्या जाल्यार दुसरो ट्रक उत्तर प्रदेशांत वतालो. ह्या दोनूय ट्रकांनी प्लास्टीक कदेलां आडव्यो मांडिल्ल्यो. पूण ताच्या पोंदां वेगवेगळ्या कंपनींच्यो व्हड प्रमाणांत सोऱ्यांच्यो काशी सांपडल्यो.
सुरवेक एक ट्रक आडयाल. त्या वेळार वाहन चालकान कागदपत्रां घेवन तपासणी नाक्याचेर दिवपाक येतना थंयच्यान पळून गेलो. ताका लागून अबकारी अधिकाऱ्यांक दुबाव आयलो. ताका लागून ताच्या फाटोफाट दुसरो ट्रक आयलो ताकाय अबकारी अधिकाऱ्यांनी आडायलो. तातूंत लेगीत तशेंच तरेचो सोरो आशिल्ल्याचें अधिकाऱ्यांक दिसलें. दोनूय ट्रकांतलो वट्ट 40 लाखांचो सोरो अधिकाऱ्यांनी जप्त केलो.
एक ट्रक फांतोडेर देड वरांचेर जाल्यार दुसरो सकाळीं 8 वरांचेर आयिल्लें. अबकारी अधिकारी निरिक्षक कमलेश माजीक, उपनिरिक्षक विभुती शेट्ये, उपनिरिक्षक जयेश बांदेकार, विशाल गांवस, सुनील कारबोटकार, दशरथ तारी, लाडू गांवकार, जानू जोरे हांणी ही कारवाय केली. एमएच 073 आनी एमएच एटीएन बी जी 1336 हे ट्रक अबकारी विभागान जप्त केल्यात. तशेंच एका वाहन चालकाक अटक केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
