भांगरभूंय | प्रतिनिधी
पणजी, बातमीदार ः फाटल्या सप्तकांत भाजयांचे दर उणे जाल्ल्यान गिरायकांक सुशेग मेळिल्लो. पूण ह्या सप्तकांत कांय भाज्यांनी परतून शंबरी हुपल्या. फाटल्या सप्तकांत पणजे बाजारांत शिमला मिरसांग, वांयगी, मटार, बीन्स तशेंच पाचवीं मिरसांग 100 रुपया दर किल दरान विकताले. जाल्यार लिंबाचे दर 20 रुपयाक 3 लिंबू आनी आडसर 50 ते 60 रुपया आशिल्लें.
पणजे बाजारांत कांदो, बटाट्याचे दर फाटल्या सप्तकांत 30 रुपया किल आशिल्ले. जाल्यार टोमॅटोचे दर 30 ते 35 रुपया किल. बुधवारा फळ उत्पादन मंडळाच्या गाड्यांचेर कांदो 26, बटाट 27 आनी टोमॅटो 23 रुपया दर किल आशिल्लो. जाल्यार मिरसांग 78 रुपया, भेंडी 100 आनी बीन्स 62 रुपया दर किल दरान विकताले.
फाटल्या कांय म्हयन्यां सावन वाडत आशिल्लें आलें आनी लसणाचे दर आतां देंवपाक लागल्यात. बुधवारा बाजारांत आल्यांचे दर 160 रुपया किल आशिल्ले. जाल्यार लसणाचें दर किलोक 300 ते 320 रुपया. मागणी वाडिल्ल्यान आनी पुरवण उणी जाल्ल्यान लसणाचें दर वाडले. देखून फाटल्या कांय म्हयन्यांत लसणाचें दर 480 रुपया किला मेरेन पावले. हाचे भायर बुधवारा पणजे बाजारांत भेंडे 80 रुपया, फ्लॉवर 40 रुपया, कोबी 35 रुपया, दोडगें 80 रुपया, गाजर 80 रुपया आनी दुदी भोपळो 40 रुपया किल दरान विकताले. मेथी, कोथमिर आनी शेपू 20 रुपया पेंडी, पालक 10 रुपया दरान विकताले.
तांतयांचें दर वाडलें…
जानेवारी सावन राज्यांत तांतयांचे दर वाडत आसा. देशभरांत तांतयांचें उत्पादन मागणे परस 10 ते 15 टक्क्यांनी उणें आशिल्ल्यान तांतयांचे दर वाडल्यात. पणजेंत एक डझन तांतयांचें दर आकारा प्रमाण 75 ते 85 रुपया मेरेन पावल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
