भांगरभूंय | प्रतिनिधी
पणजी, बातमीदार ः स्मार्ट सिटीच्या कामाक लागून पणजेंत पे पार्किंग बंद आशिल्लें. आयच्यान तें परतून सुरू केल्यात अशीं म्हायती महापौर रोहित मोन्सेरात हांणी दिली.
पणजेंतल्या चडशा सुवातींनी गाडयो पार्क करपाक पयशे दिवचे पडटात. पणजीत स्मार्ट सिटी खाला चालू आशिल्ल्या कामांच्या फाटभुंयेर पणजी पालिका म्हामंडळान राजधानी पणजेंत 31 मे मेरेन गाडयांक पे-पार्किंग शुल्क भरचो पडचो ना असो निर्णय मार्च म्हन्यांत घेतिल्लो. फाटल्या देड वर्सां सावन पणजेंत स्मार्ट सिटी खाला कामां चालू आसात. ताका लागून जायत्या वाठारांनी रस्ते खणल्यात. देखून थळाव्या लोकांक तशेंच कामा निमतान येवपी नागरिकांक गाडयो पार्क करपाक सुवात मेळ नाशिल्ली. जंय जंय सुवात मेळटा थंय लोक गाडयो पार्क करतात. तरी लेगीत तांकां पे-पार्किंग खातीर पालिके कडल्यान थारायिल्ली शुल्क भरचें पडटाले. हाका लागून जायत्या वाहन चालकांनी तिडक उक्तायली. देखून महापौर रोहित मोन्सेरात हांणी स्मार्ट सिटीचीं कामां पुराय करपा खातीर दिल्ल्या 31 मे मेरेनच्या काळा मेरेन चालकां कडल्यान पे-पार्किंग शुल्क घेवचें नात असो निर्णय घेतिल्लो.
स्मार्ट सिटींची जायतीं कामा आतां पुराय जाल्ल्यान लोकांक गाडयो पार्क करपाक पार्किंग सुवात मेळटली. देखून आयच्यान थारायिल्ल्या प्रमाण पे पार्किंग शुल्क सगल्यां वाहनांक भरचें पडटलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
