भांगरभूंय | प्रतिनिधी
पणजी : सांतिनेज- पणजेच्या पीडब्ल्यूडी कार्यालया मुखारचो रस्तो कॉंक्रीटचो करतले. मात, ह्या कामाच्या काळ मर्यादे विशीं सद्या अस्पश्टताय निर्माण जाल्या. कारण दोन दिसां पयलीं इमॅजीन पणजी स्मार्ट सिटी लिमिटेड कार्यालयान हें काम एका म्हयन्यांत पुराय करपाचें जाहीर केल्लें. मात, आयज हेच एजन्सीचे सीईओ संजीत रॉड्रिग्स हांणी हें काम पुराय जावपाक आनीक दोन म्हयने लागतले अशें सांगलें.
सांतिनेजच्या स्टर्लिंग अपार्टमेंट (झाकीज बिर्याणी) ते काकुलो मॉल जंक्शन हांगचो पीडब्ल्यूडीच्या कार्यालया मेरेनचो रस्तो येरादारी खातीर पुरायेन बंद उरतलो. हें काम पुराय जावपाक ३० दीस लागतले, अशें इमॅजिन पणजी स्मार्ट सिटी लिमिटेड कार्यालयान दोन दिसां आदीं जाहीर केल्लें. ते प्रमाण सध्या हो रस्तो बंद करून खणपाचें काम सुरू केलां. पूण कुशीकच्यान गाडयो वतात. तशेंच आयज (ता. १) मुंबय उच्च न्यायालयाचे न्यायमूर्ती पणजेच्या कामांची पळोवणी करतले. हे फाटभूंयेर पळोवणी आदीं आढावो घेवपाक इमॅजीन पणजी स्मार्ट सिटी लिमिटेडचे सीईओ संजीत हांणी आयज सकाळीं पळोवणी केली. पळोवणी करपाक जेन्ना ते हे सुवातेर आयले तेन्ना पत्रकारांनी तांकां, ‘हें काम केन्ना पुराय जातलें?’ असो प्रस्न विचारलो. ह्या वेळार तांणी ‘पीडब्ल्यूडी कार्यालय ते विवांता जंक्शन मेरेनचो रस्तो कॉंक्रीटचो करतले. येत्या ३१ मे मेरेन हें काम पुराय जातलें.’ अशी जाप दिली.
पत्रकारांनी तांकां आनीक प्रस्न विचारपाक सुरवात केली तेन्ना, ‘हो विशय न्यायप्रविश्ठ आशिल्ल्यान हांव आनीक कांयच उलोवपाक शकना.’’ अशी जाप दिवन ते रोखडेच थंयच्यान गेले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
