भांगरभूंय | प्रतिनिधी
वसुली खातीर लीज कबलाती सयत कायद्यांतूय करची पडटली दुरुस्ती
पणजी: गाळ्यांचें थकीत भाडें भरपा विशीं पणजी म्हानगरपालिकेन (मनपा) च्या 400 वेपाऱ्यांक नोटिसो जारी केल्यात, तांचे कडल्यान सुमार 10 कोटींचें भाडें थकीत आसा. भाडें वसूल करपा खातीर वेपाऱ्यां सयत लीज कबलात करून मनपा कायद्यांतूय सरकाराक बदल करचो पडटलो अशें आदले म्हापौर तशेंच सद्याचे नगरसेवक उदय मडयकार हांणी मंगळारा ‘भांगरभूंय’ कडेन उलयतना सांगलें.
सर्गेस्त मनोहर पर्रीकार मुख्यमंत्री आसतना पणजे मार्केटाची इमारत पुराय जाली. उपरांत पोरण्या मार्केटांतल्या वेपाऱ्यांक नव्या मार्केटांत स्थलांतरीत केलें. त्या वेळार गोंय साधन सुविधा विकास म्हामंडळान दुकानां स्थलांतरीत करीत आसतना वेपाऱ्यांच्या नांवांची जी वळेरी तयार केल्ली, ती वळेरी मनपा कडेन ना. तशेंच त्या वेळार वेपाऱ्यां कडेन कबलातूय करूंक नाशिल्ली. दुसरे वटेन मनपा कायद्या प्रमाण पणजे मार्केटांतल्या वेपाऱ्यांक आपलें दुकान फक्त रगताच्या नात्यांतल्या मनशांकूच विकपाक परवानगी आशिल्ली. पूण, कांय वेपाऱ्यांनी आपलीं दुकानां हेरांक विकल्यांत. सद्या मनपान ज्या वेपार्यांक नोटिसो जारी केल्यांत तातूंतले 80 टक्के वेपारी हे गाळो मेळयिल्ल्या वेपाऱ्याच्या रगतांतले नात. ताका लागून तांचेर कारवाय करूंक मेळची ना. ह्या वेपारी फाटल्या खूबशा वर्सां सावन लीज कबलात करपाची मागणी करतात. मनपान लीज कबलात केल्यार थकीत सगलें भाडें दिवपाची आनी सद्या आशिल्ल्या दरा प्रमाण भाडें दिवपाची तयारी तांणी दाखयल्या. ताका लागून आतां तांचे कडेन लीज कबलात करून आनी कायद्यांतल्या रगताच्या नात्यांतल्या मनशाकच दुकान विकपाची अट रद्द केली जाल्यार वेपाऱ्यां कडल्यान सगलें भाडें मनपाक मेळटलें अशेंय मडकयकार हांणी नमूद केलें.
मनपा राजकारणाची बळी
पणजे मार्केटांतले खूबशे गाळे राजकारण्यांनी काबीज केल्यात. दर वर्सा मनपा थकीत भाडें वसूल करपा खातीर नोटिसो जारी करता. पूण दुकानांचे धनी आशिल्ले राजकारणी पद्दतशीरपणान हातूंत आडमेळीं हाडीत आशिल्ल्याची म्हायती मनपांतल्या गोपांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
