भांगरभूंय | प्रतिनिधी
पणजी : पणजी महापालिकेन मंगळारा अर्थीक वर्स २०२६-२७ खातीरच्या १०७.१७ कोटी रुपयांच्या अर्थसंकल्पाक मंजुरी दिली. चालू अर्थीक वर्सा महापालिकेक कर आनी हेर उत्पन्नांतल्यान ११३.१९ कोटी महसूल मेळपाची अपेक्षा आशिल्ल्यान ११३.०३ कोटी रुपया महसुली खर्च जातलो. जाल्यार ३७.०३ कोटी भांडवली उत्पन्न आनी ५०.० कोटी भांडवली खर्च जावपाची अपेक्षा आसा. अंदूच्या अर्थसंकल्पीय निधींतल्यान विवीध उदरगतीचीं कामां करपाक प्राधान्य दितले, अशी म्हायती महापौर रोहित मोन्सेरात हांणी दिली.
बसके उपरांत महापौरांनी माध्यमां कडेन संवाद सादलो. फाटल्या कांय वर्सां प्रमाण अंदूंय आमी शिलकी अर्थसंकल्प सादर केलो. आमचेर कितलेय आरोप जाले तरी महानगरपालिका केन्नाच लुकसाणांत वचूंक ना. आमचे पयलीं दर वर्सा घरपट्टी पांच ते धा टक्क्यांनी वाडिल्ली. अंदूंय आमकां घरपट्टी वाडोवपाचो पर्याय दिवपाचो आशिल्ले. मात आमी तो न्हयकारला. प्रशासन योग्य पद्धतीन कर एकठांय करिना. मात हाचें वजें आमी सामान्य पणजीकरांचेर घालप चुकीचें आशिल्ल्यान आमी घरफळा वाडोवचें न्हय असो निर्णय घेतला.
तांणी म्हणलें, अंदूंच्या अर्थसंकल्पांत पणजेच्या उदरगतीच्या कामां खातीर साधारण २५ कोटी रुपयांची तरतूद केल्या. ते प्रमाण आमी पणजे ऑटिझम आशिल्ल्या भुरग्यां खातीर विशेश केंद्र उबारपाचो विचार करतात. अशें करपी पणजी ही देशांतली पयली महानगरपालिका थारतली. नुस्त्या बाजाराचें काम योग्य तरेन जावंक ना. हें काम परत नवे तरेन करचें पडटलें. तशेंच भाजयेच्या बाजारांत विवीध कामां करतले. नगरसेवकांक तांच्या प्रभागात गरजेचो आशिल्लो निधी सरकारकडल्यान उपलब्ध करून दिवप हें म्हजें काम.
शारांत सध्या कांय सुवातांचेर घाणयार्या उदकाचीं पायपां, ड्रेन दुरुस्तीचीं कामां चालू आसात. स्मार्ट सिटी खाला १८ जून रस्त्याचें काम करपाचें आशिल्लें. मात कांय कारणांक लागून मागीर तें सोडून दिलें. आतां परत ह्या रस्त्याच्या कामा खातीर प्रस्ताव दितले. स्मार्ट सिटीन ह्यान पयलीं एकदांच सगले रस्ते बंद केल्ल्यान शारांत येरादारी कोयंडी जाल्ली. हाका लागून १८ जून रस्त्याचें काम सुरू करचे पयलीं ताचो आराखडो आमकां दिवपाची मागणी आमी स्मार्ट सिटी कडेन केली.
पुलीस अधिकार्यांच्यो रित्यो सुवातो भरात
रोहित मोन्सेरात हांणी, गृहखात्याच्या आदेशा प्रमाण फकत पीआय आनी पीएसआय येरादारी नेम माडिल्ले खातीर चलन दिवपाक शकतात. पणजी पुलीस स्टेशन आनी येरादारी विभागांत सध्या पुलीस अधिकार्यांच्यो खुबश्यो सुवातो रित्यो आसात. ह्यो सुवातो भरपाची मागणी आमी गृह खात्याक केल्या. पणजे पुलीस अधिकार्यांचो आंकडो वाडल्यार येरादारी प्रस्न सुटपाक शकतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
