भांगरभूंय | प्रतिनिधी
गणेश गांवकार: पक्ष उमेदवारी दिता ताचे वटेन रावतलों
केपें, सांगें, प्रियोळ आनी वेळ्ळी एसटी खातीर आरक्षीत जावप शक्य
पणजी: आयज मेरेन पक्षान जें किदें म्हाका सांगलां तेंच हांवें आयकलां. हाका लागून सांवड्डें मतदारसंघांत पक्ष जाका उमेदवारी दितलो, ताचे वटेन हांव रावतलों अशें सभापती तशेंच सांवड्डेंचे आमदार गणेश गांवकार हांणी सांगलें. केपें, सांगें, प्रियोळ आनी वेळ्ळी हे मतदारसंघ एसटी खातीर आरक्षीत जावप शक्य आसा, अशेंय तांणी सांगलें.
प्रुडंट मिडियाच्या ‘हेड ऑन’ कार्यावळींत उलयतना तांणी ही म्हायती दिली. आतां फाटीं नाच्च, ह्या संकेत आर्सेकार हांच्या उलोवपाक हांव चड म्हत्व दिना, अशें तांणी सांगलें. मुख्यमंत्री डॉ. प्रमोद सावंत हांचे जोड सचीव संकेत आर्सेकार हांणी जोड सचीवपदाचो राजिनामो दिला. राजिनामो दिले उपरांत आतां फाटीं नाच्च, हें उलोवप तांणी केलां. हे विशीं उलयतना हांव हाका चड म्हत्व दिना, अशें तांणी सांगलें. जाणें हें उलोवप केलां ताणें सरकारीपदाच्या नोकरेचो राजिनामो दिला काय? म्हाका हें खबर ना. सरकारी नोकरेंत आसतना एखादो मनीस अशे उलोवप करता, ताका कितले म्हत्व दिवप? असो प्रस्न तांणी केलो. म्हजे कडेन परमेश्वराचो आशिर्वाद आसा. हांव जसो पक्षा फाटल्यान रावलां तसो पक्ष लेगीत म्हजे फाटल्यान रावला. हाचे मुखार लेगीत पक्ष म्हजे फाटल्यान रावतलो, असो विस्वास तांणी उक्तायलो.
तरणाट्यांनी राजकारणांत वांटेकार जावंक जाय, अशें मत प्रधानमंत्री नरेंद्र मोदी हांचे आसा. तरी लेगीत अणभव हो खूब म्हत्वाचो आसता. नोकरे खातीर लेगीत अणभवाची अट आसता. वेंचणुकेंत देंवचे पयलीं समाजीक वावराचो अणभव तरणाट्यांनी घेवपाक जाय, अशें तांणी सांगलें.
येता ते वेंचणुकेंत एसटी खातीर आरक्षण लागू करपाचे आमचे यत्न आसतले, अशें आस्वासन केंद्रीय गृह मंत्री अमीत शहा हांणी दिलां. तांच्या आस्वासनाचेर आमकां विस्वास दवरचो पडटलो. एसटी आरक्षणाचो कायदो संमत जाला. एसटीची लोकसंख्या चड आशिल्ले चार मतदारसंघ आरक्षीत जातले. केपें, सांगें, प्रियोळ आनी वेळ्ळी हे मतदारसंघ आरक्षीत जावपाची शक्यताय आसा. वेळ्ळी राखीव जालो ना जाल्यार नुवें मतदारसंघ आरक्षीत जातलो, अशें गणेश गांवकार हांणी सांगलें.
रमेश तवडकार आनी गोविंद गावडे हे दोगूय एसटी समाजाचे फुडारी आसात. दोगूय जाण एसटी समाजा खातीर वावुरतात. प्रेरणा दिसा निमतान सगले एसटी फुडारी एकठांय आयले. ह्या दाेगांच्या व्हडपणाक लागून दोगांकूय एकठांय हाडप म्हाका सहज शक्य जालें, अशें तांणी सांगलें.
सभापती हो तटस्थ आसपाक जाय. गोंय विधानसभेंत प्रस्नोत्तराक 4 ते 5 प्रस्न चर्चेक येतात. हो आंकडो वाडोवपाची गरज आसा. प्रस्नोत्तराक उण्यांत उणें 7 ते 8 प्रस्न चर्चेक घेवपाचो सभापती म्हूण यत्न आसतलो, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
