भांगरभूंय | प्रतिनिधी
पणजी, बातमीदार ः आतां मेरेन पक्षान दिल्ल्यो सगळ्यो जापसालदारक्यो हांवें सांबाळ्ळ्यात. पक्षान जापसालदारकी दिल्यार थळाव्या राजकारणांत येवपाक हांव तयार आसा अशें केंद्रीय उर्जा राज्यमंत्री श्रीपाद नायक हांणी सांगलें. सोमारा मराठी पत्रकार संघ आनी गोंय श्रमिक पत्रकार संघटणेन आयोजीत केल्ले कार्यावळींत ते उलयताले. ह्या वेळार माचयेर जयंत संभाजी, गुरूदास सावळ, वामन प्रभु, राजतिलक नायक आदी मानेस्त हाजीर आशिल्ले.
श्रीपाद नायक हांणी सांगलें, आतां मेरेन पक्षान म्हाका चार फावटीं मंत्रीपदाची जापसालदारकी दिल्या. पूण हांवें आपूण जावन पक्षा कडेन कसल्याच पदाची मागणी करुंक नाशिल्ली. पक्षान संद दिल्यार थळाव्या राजकारणांत येवपाक हांव तयार आसा. पूण त्यो फुडल्यो गजाली. कॅबिनेट आसूं वा राज्यमंत्री पद आसूं जनतेची सेवा करप म्हत्वाचें. मंत्रीपद, खासदारकी, आमदारकी वा हेर कसलेंच पद नासलें तरी हांव लोकांची सेवा करतलों.
राज्याचे उदरगती खातीर तमनार सारकिल्ले प्रकल्प गरजेचे आसात. कांय पर्यावरण मोगी ताचे आड आसात. पूण पर्यावरण सांबाळून लेगीत हो प्रकल्प करप शक्य आसा. एक झाड कापल्यार हजार झाडां लावप शक्य आसा. हाचेर समुपदेशना वरवीं उपाय काडटले. कर्नाटक सरकारा कडेनय मेळ करून हाचेर मार्ग काडूं येता. तमनार संबंदी बेगीनूच गोंय सरकारा कडेन बसका जातली अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
