भांगरभूंय | प्रतिनिधी
दयानंद मांद्रेंकारः प्रामाणीक काम केल्ल्याचो दावो
भांगरभूंय । प्रतिनिधी
म्हापशें: विरोधी आमदारांक घाऊक पद्दतीन पक्षांत आस्पाव करून घेवपी राजकी घडामोडी वा पक्षांतरां हीं योग्य नात. तातूंतल्यान जनभावना दुखावता. लोक बेजार जावपाक शकतात, अशें स्पश्ट मत आदले मंत्री दयानंद मांद्रेंकार हांणी उक्तायलें. काँग्रेस पक्षाच्या आठ आमदारांच्या भाजपा प्रवेशाचेर प्रतिक्रिया दितना मांद्रेंकार पत्रकारां कडेन उलयताले.
सत्ते खातीर आमी केन्नाच पक्षांतर करूंक ना. सत्तेची आंस बाळगिनासतना आमी पुराय पांच वर्सां विरोधांत बशिल्ले. हाचेंच फळ म्हूण लोकांनी 2012 त भाजपाक पुराय भोवमताचें सरकार दिल्लें. पक्षवाड आनी भाजपाचो प्रसार हें एकमेव ध्येय मनांत बाळगून आमी काम केलें. सध्या काँग्रेसीच्या आठ आमदारांनी भाजपांत प्रवेश केलो, ताचेर आपल्याक कांयच उलोवपाचें ना. जें कितें घडलां, तें सगळें लोकां मुखार आसा. गोंयकार निर्णय घेतले, अशें सांगून मांद्रेंकार हांणी हे विशीं अदीक उलोवपाचें टाळ्ळें. भाजपाच्या प्रसारा खातीर आमी सदांच प्रामाणीक काम केलें. केन्नाच कसलीच अपेक्षा बाळगूंक ना. मनोहर पर्रीकार, लक्ष्मीकांत पार्सेकार, राजेंद्र आर्लेकार, फ्रांसीस डिसोझा आनी आपूण मदल्या काळांत धा वर्सां भाजपाचे प्रदेश गाबो समितीच्या गटांत आशिल्ले. ह्या गटाच्या माध्यमांतल्यान आपल्याक पक्षा खातीर काम करपाची संद मेळ्ळी आनी आपणे प्रामाणीक काम करपाचो यत्न केलो, अशें मांद्रेंकार हांणी सांगलें.
शिस्त नाशिल्ल्यान स्थिती उप्रासलीः मांद्रेंकार
ज्या पक्षांतल्यान हे पक्षांतर करपी फुडारी आयले, तांकां थंय शिस्त आनी बरें फुडारपण मेळिल्लें जाल्यार ही स्थिती उप्रासची नाशिल्ली. तांच्या ह्या पक्षांतराचेर आपूण कितें उलयतलों? हे राजकी घडामोडीक लागून भाजपाचे खंयचे खंयचे कार्यकर्ते दुखावल्यात आसतले, हाची आपल्याक कल्पना ना. आपूण दोन खेपे सेगीत वेंचून आयिल्लों, अशें दयानंद मांद्रेंकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
