भांगरभूंय | प्रतिनिधी
भांगरभूंय । प्रतिनिधी
मुरगांवः बायलांक नेतृत्व फुडें हाडपा खातीर केंद्र आनी राज्य सरकार जायते उपक्रम चालीक लायता. एक बायल सक्षम जाल्यार ताचो फायदो पुराय समाजाक जाता. पंतप्रधान नरेंद्र मोदी हांणी बायलांक मानाचे सुवात मेळोवन दिल्या. ताचे विश्वकर्मा येवजणेतल्यान बायलांक स्वावलंबी जावपाची संद मेळटा अशें राज्यसभा खासदार आनी प्रदेश भाजपा अध्यक्ष सदानंद शेट तानावडे हाणे सांगलें.
मुरगांवच्या जयतारा नारी वेल्फेर ट्रस्टा वतीन संवसारीक बायल दिसा निमतान सडा हांगच्या छत्रपती शिवाजी महाराज माचयेर आयोजीत केल्ले कार्यावळींत तानावडे उलयतालो. माचयेर उदका स्रोस मंत्री सुभाष शिरोडकार, मुरगांवचो आमदार संकल्प आमोणकार, साळगांवचो आमदार केदार नायक, राज्य भाजप महिला मोर्चा अध्यक्ष आरती बांदोडकार, राज्य भाजपा महिला मोर्चा प्रभारी सुलक्षणा सावंत, जिल्हो पंचायत वांगडी सुवर्णा तेंडुलकार, मुरगांव भाजाप गटाध्यक्ष संजय सातार्डेकार, संतो, केरकार, जयतारा ट्रस्टाची अध्यक्ष आनी नगरसेविका श्रद्धा आमोणकार, अविनाश नायक, शांताराम पराडकार, महेश नायक आशिल्लो.
आदलो मुख्यमंत्री सर्गेस्त मनोहर पर्रीकार हाच्या पाचवे पुण्यतिथी निमतान मानेस्तानी तांका आर्गां ओपलीं. उपरांत बायलां दिसा निमतान मुरगांव वाठारांत सामाजीक मळाव वावुरपी बायलांचो मानेस्ताचे हस्तुकीं भोवमान केलो. पंतप्रधान विश्वकर्मा येवजणेत वांटेकार जाल्ल्या बायलांक प्रशस्तीपत्रां भेटयलीं. ह्या वेळार सुभाष शिरोडकार, संकल्प आमोणकार, केदार नायक, आरती बांदोडकार, सुलक्षणा सावंत हांची भाशणा जालीं. सुरवेक श्रद्धा आमोणकारान सगल्यांक येवकार दिलो. सूत्रसंचालन रिमा सोनुर्लेकारान केले आनी अर्पिता वेंगुर्लेकारान उपकार मानले. कार्यावळींत सांस्कृतीक कार्यावळी जाल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.