भांगरभूंय | प्रतिनिधी
भांगरभूंय । खबरां मेज
पणजीः पंतप्रधान नरेंद्र मोदी हांणी बरयल्ल्या “एक्झाम वॉरियर्स” ह्या पुस्तकाचें राजभवनाच्या पोरण्या दरबार हॉलांत जाल्ले एके कार्यावळींत राज्यपाल पी एस श्रीधरन पिल्लय हांणी प्रकाशन केलें. मोदी हांणी 2018 वर्सा विद्यार्थ्यांच्या हिता खातीर हे पुस्तक बरयल्लें. ताचें म्हत्व मतींत घेवन नॅशनल बुक ट्रस्टान केंद्रीय शिक्षण मंत्रालयाच्या पालवान तें प्रकाशीत केलां.
हे कार्यावळीक ज्ञानपीठ साहित्य पुरस्कार जैतिवंत लेखक दामोदर मावजो, केंद्रीय पर्यटन राज्यमंत्री श्रीपाद नायक, गोंय विद्यापिठाचे कुलगुरू प्रा हरिलाल मेनन, श्रीमती रिता पिल्लय आनी हेर मानेस्त हाजीर आशिल्ले. परिक्षा संबंदीच्या विशयांचेर पंतप्रधान नरेंद्र मोदी हांणी पुस्तक बरयलां हाची राज्यपालान तोखणाय केली आनी परिक्षेच्या वेळार मनाचे ताण घेनाकात असो सल्लो विद्यार्थ्यांक दिलो. मनोबल वाडोवपा खातीर ह्या पुस्तकाचो विद्यार्थ्यांनी उपेग करपाक जाय अशें तांणी सांगलें.
समाजांतल्या सगल्या घटकांतल्या लोकांक जाय ते दिकेन मुखार व्हरपा खातीर पंतप्रधान नरेंद्र मोदी सदांच मार्गदर्शन करतात. तांणी पुस्तकांत दिल्ल्या मंत्राचो विद्यार्थ्यांनी आपली शिक्षणीक प्रगती करपाक उपेग करपाक जाय अशें पर्यटन राज्यमंत्री श्रीपाद नायक हांणी सांगलें. शीव शंकरन, दामोदर मावजो आनी प्रा. मेनन हाणी आपले मनोगत उक्तायलें. पुस्तकाची पयली प्रत मावजो, मेनन आनी डॉ हेडगेवार, मुश्ठीफंड, रोझरी, अवर लेडी ऑफ रोझऱी आनी पीपल्स हायस्कुलाच्या विद्यार्थ्यांक भेटयली. राज्यपालाचे सचीव एमआरएम राव हांणी सुरवेक सगल्यांक येवकार दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
