भांगरभूंय | प्रतिनिधी
पंजाब किंग्सान लखनौ सुपर जायण्ट्साक 7 विकेटींनी हारोवन प्लेऑफांत सुवात मेळोवपाची आपली आस्त कायम राखल्या. ह्या जैतान ताचे 15 गूण जाल्यात. तो सध्या गुणतकट्यांत चवथे सुवातेर आसा. आतां ताचो सगलो फुडार आयज जावपी राजस्थान रॉयल्स आनी मुंबय तशेंच कोलकाता आनी दिल्लीचे मॅचीचेर तिगून आसा.
लखनौन पयली बॅटींग करतना 6 विकेटी व्हगडावन 196 धांवड्यो केल्यो, पंजाबान 18 ओव्हरींनी 3 विकेटी व्हगडावन 200 धांवड्यो करून जैत जोडलें. मुखेली श्रेयस अय्यरान नाबाद 101 धांवड्यांची खेळी केली. ताचे खेरीत ओपनर प्रभसिमरन सिंगान 69 धांवड्यांचें योगदान दिलें.
ते आदीं आपले निमाणे मॅचींत, जोश इंग्लिस आनी अब्दुल समद हांच्या म्हत्वाच्या योगदाना नेटार लखनौ सुपर जायण्ट्सान 6 विकेटी व्हगडावन 196 धांवड्यो केल्यो. पंजाबाच्या बॉलरांनी थारावीक अंतरान विकेटी घेवन लेगीत लखनौन 200 मेरेन मजल मारली.
ते आदीं टॉस हारल्या उपरांत पयली बॅटींग करपाक मैदानांत देंवपी तांची सुरवात आक्रमक जाली. ओपनर जोश इंग्लिसान फास्ट बॉलर अर्शदीप सिंगाचे पयलेच ओव्हरींत 16 धांवड्यो केल्यो.
पूण, फुडले ओव्हरींत अझमतुल्लाह ओमरझाईन अर्शिन कुलकर्णीक शुन्याचेर बाद केलो. ते उपरांतचे ओव्हरींत मार्को जानसेनान निकोलस पुरनाक (2) बोल्ड करून लखनौक अचडणींत हाडलो. ते उपरांत पांचवे ओव्हरींत आयुष बदोनीन मार्को जानसेनाचे बॉलिंगेचेर 18 धांवड्यो करून पंगडाचो डाव सांबाळ्ळो.
बदोनीन आपली आक्रमक खेळी फुडले ओव्हरींत लेगीत कायम दवरली. ताणें ओमरझाईचे ओव्हरींत 22 धांवड्यो केल्यो. सुरवातीक दोन विकेटी व्हगडावन लेगीत लखनौन पावरप्लेंत 2 बाद 66 अशी धांवसंख्या उबारली. सातवे ओव्हरीच्या चवथ्या बॉलाचेर युझवेंद्र चहलान आयुष बदोनीक बाद करीत पंजाबाक म्हत्वाचें येस मेळोवन दिलें. बदोनीन फक्त 18 बॉलांनी पांच चवके आनी तीन सक्यांचे मजतीन 43 धांवड्यांची आक्रमक खेळी केली.
बदोनी बाद जाल्या उपरांत, मुखेली ऋषभ पंत आनी ओपनर जोश इंग्लिस हांणी नियमीत चवके मारीत धांवसंख्या हालयत दवरली. पयल्या 10 ओव्हरींनी तांणें 3 बाद 100 धांवड्यो केल्यो.
14वे ओव्हरींत इंग्लिसान 28 बॉलांनी आपलो अर्द शेंकडो पूर्ण केलो. पूण, चहलान परतून एकदा पंजाबाक येस मेळोवन दिलें. ताणें पंताक बाद करून ही जोडी फोडली. पंतान इंग्लिसा वांगडा मेळून 65 धांवड्यांची भागिदारी केल्ली. पंतान 22 बॉलांनी 26 धांवड्यो केल्यो. हातूंत तीन चवक्यांचो आस्पाव आशिल्लो. ह्या टप्प्याचेर लखनौची धांवसंख्या 4 बाद 124 अशी आशिल्ली.
पंत बाद जाल्या उपरांत लेगीत धांवड्यांचो ओघ चालूच उरलो आनी 16वे ओव्हरी मेरेन लखनौन 4 बाद 157 धांवड्यो केल्यो.
17वे ओव्हरीच्या निमाण्या बॉलाचेर शशांक सिंगान ओपनर इंग्लिसाक बाद केलो. ताणें 44 बॉलांनी 72 धांवड्यो केल्यो. हातूंत णव चवक्यांचो आनी दोन सक्यांचो आस्पाव आशिल्लो. फुडले ओव्हरींत जानसेनान मुकुल चौधरीक (1) बाद करून आपली दुसरी विकेटी घेतली.
निमाणे ओव्हरींत अर्शदीप सिंगान 17 धांवड्यो दिल्यो, जाका लागून लखनौक 6 विकेटी व्हगडावन 196 धांवड्यां मेरेन मजल मारप शक्य जालें. अब्दुल समदान 20 बॉलांनी नाबाद 37 धांवड्यो केल्यो. पंजाबा वतीन युझवेंद्र चहल आनी मार्को जानसेन हांणी दोन-दोन विकेटी घेतल्यो. अझमतुल्लाह ओमरझाई आनी शशांक सिंग हांकां 1-1 विकेट फावो जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
