भांगरभूंय | प्रतिनिधी
मुल्लांपूरांत जाल्ले इंडीयन प्रिमीयर लिगेचे (आयपीएल) दुसरे मॅचींत येजमान पंजाब किंग्सान दिल्ली कॅपिटल्साक 4 विकेटींनी हारयलो. पंजाबा वतीन सॅम करनान अर्द शेंकडो आनी लियम लिव्हिंगस्टनाच्या ताबडतोड बॅटींग दिल्ली कॅपिटल्साक म्हारग पडली. जाल्यार दिल्ली वतीन अभिषेक पोरेल, इशांत शर्मा आनी कुलदीप यादव हांणी आपल्या प्रदर्शना वरवीं सगल्यांक प्रभावीत केले.
दिल्लीन 9 विकेटी वगडावन 174 धांवड्यो केल्यो, जाल्यार पंजाबान 19.2 ओव्हरींनी 6 विकेटी वगडावन 177 धांवड्यो करून जैत जोडलें.
पंजाबाच्या जैतांत साबार खेळगड्यांनी हातभार लायलो. अर्शदीप सिंगान मिचेल मार्शाक बाद केलो, जाल्यार बॉलाचेर नदर स्थिरायिल्लो आक्रमक बॅट्समन डॅव्हिड वॉर्नराक हर्षल पटेलाक तंबूंत परतून धाडलो. हर्षल निमाण्या ओव्हरींनी आपल्या प्रदर्शनाचेर समाधानी आसचो ना. विकेटकीपर आनी उप मुखेली जितेश शर्मान लेगीत म्हत्वाची भुमिका वठयली. वॉर्नर आनी रिकी भुई हांच्या रुपान दोन विकेटी जितेशान रिव्ह्यू वरवीं पंगडाक मेळोवन दिल्यो.
दिल्ली कॅपिटल्सा वतीन दोन मुखेल नायक थारले. दिल्लीचो डाव डॅथ ओव्हरींनी गडगडलो त्या वेळार विकेटकीपर बॅट्समन अभिषेक पोरेलान ताबडतोड बॅटींग करून दिल्लीक लडपा सारकी धांवसंख्या उबारून दिली. दिल्लीन निमाण्या पांच ओव्हरींनी 50 धांवड्यो केल्यो. जाल्यार निमाणे ओव्हरींत पोरेलान 25 धांवड्यो केल्यो. ताणें हर्षल पटेलाचे बॉलिंगेर केल्यो.
मजगतीं, पंजाबान बॉलिंग करपाक सुरवात केल्ली त्या वेळार इशांत शर्मान पयलीं मुखेली शिखर धवनाक बोल्ड केलो आनी आपल्याच फॉलो थ्रूंत जॉनी बॅयरस्टोक नॉन स्ट्रायकर अॅण्डाचेर धांवबाद केलो.
मॅचींत साबार अशे खीण आयले की मॅच खंयचेय वटेन वचपाक शकताली. पूण, पंजाबान दिल्लीक मॅचींत पुनरागमन करपाक आनी आपल्याचेर शेक दवरपाक दिलो ना. ताणें कावण्टर अॅटेक चालूच दवरलो. दिल्लीन आक्रमक सुरवात केल्ली. पूण, थारावीक अंतरान विकेटी घेवन ताचो डाव स्लो केलो. पोरेलान निमाण्या ओव्हरींनी केल्ले ताबडतोड बॅटिंगेक पंजाबान आक्रमक सुरवात करून जाप दिली. बॅयरस्टो धांवबाद जालो, ते उपरांत इम्पॅक्ट प्लेयर प्रभसिमरन सिंग आनी सॅम करन हांणी मेळून पंजाबाक बरे स्थितींत हाडून दवरलो. पूण, कुलदीप यादवान प्रभसिमरन आनी जितेश हांकां बाद करून दिल्ली खातीर पुनरागमनाची दारां उक्तीं केलीं. पूण, मॅचींतलो सगल्यांत व्हड टर्नींग पॉयण्ट 14वे ओव्हरींत कुलदीप यादवाच्या बॉलाचेर लॉंग ऑनांत करनाची कॅच सुटप सिद्धी जालो. जर ट्रिस्टन स्टब्सान कॅच धरिल्ली तर दिल्ली मॅची वयली आपली पकड आनीक घट्ट करपाक शकतलो आसलो. ते उपरांत मिचेल मार्शाची म्हारगी ओव्हरीन दिल्लीचें मॅचीतलें पुनरागमन कठीण करून उडयलें.
करन आनी लिव्हिंगस्टन हांणी अर्द शेंकड्याची भागिदारी करून पंजाबाचें अंदूंच्या हंगामांतलें पयलें जैत निश्चीत केलें. जैता खातीर आठ धांवड्यांची गरज आशिल्ली त्या वेळार करन बाद जालो. पूण, ते मेरेन मॅच दिल्लीच्या हातांतली गेल्ली. 19वे ओव्हरीच्या निमाण्या बॉलाचेर वॉर्नरान हरप्रीताची कॅच धरिल्ली जाल्यार दिल्लीची आस्त परतून जिवी जावपाची.
पंजाबान जरी ही मॅच जिखली आसली तरी ताका आपले बॉलिंगेंत सुदारणां करपाची गरज आसा. पंजाबाच्या पंगडांत अश्टतासांचे खेळगडे खूब आसात. पूण, बॉलिंग विभाग ताका आनीक घटमूट करपाची गरज आसा. दुसरे वटेन दिल्लीक लेगीत आपले बॉलिंग विभागाचेर आनी रणनितीचेर विचार करपाची गरज आसा. हे मॅचींत तो चार विदेशी खेळगड्यांक घेवन मैदानांत देंविल्लो. पूण, बॉलर मुकेश कुमाराचो पर्यान ताचे कडेन नाशिल्लो. हाचें लुकसाण ताका जालें. तशेंच इशांत शर्माक खोटेचे दुखापतीक लागून मैदानाच्या भायर वचचो पडलो. इशांताचे गैरहाजेरेंत मार्शाक बॉलिंगेंत म्हणपा सारकें येस मेळूंक ना. खलिलान अखेरेक दोन विकेटी घेतल्यो खऱ्यो पूण, तो मेरेन खूब उशीर जाल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
