भांगरभूंय | प्रतिनिधी
इंडीयन प्रिमीयर लिगेंत (आयपीएल) आयज येजमान गुजरात टायटन्स आनी पंजाब किंग्स ह्या पंगडां मदीं हांगाच्या नरेंद्र मोदी स्टेडियमाचेर मॅच जातली.
अंदूंच्या हंगामांत दोनूय पंगड अजून मेरेन तीन-तीन मॅची खेळ्ळ्यात. गुजरात टायटन्सान दोन मॅचींनी जैत जोडलां, जाल्यार पंजाबान दोन मॅचींनी हार घेतल्या.
2022त जाल्ले पावणी सावन आतां मेरेन गुजरात टायनट्साचो स्पिन विभाग लिगेंत सगल्यांत बरी सरासरी दवरपी आसा. राशिद खानाखाला खेळपी स्पिन विभागाची सरासरी 23.90 इतकी आसा. दुसरे वटेन पंजाब किंग्साची सरासरी 33.50 इतकी आसा. ही सगल्यांत चड सरासरीचे वळेरेंत दुसरे सुवातेर आसा.
पंजाब किंग्साचो मुखेल स्पिनर हो राहुल चाहर आसा. ताणें 30 मॅचींनी फकत 24 विकेटी घेतल्यात. जाल्यार गुजरात टायटन्सा आड तीन मॅची खेळून लेगीत ताका एकूय विकेट मेळूंक ना.
मुखेली शिखर धवनाचें पंजाब किंग्साच्या येसांत म्हत्वाचें योगदान आसा. ताचे बॅटिंगेचेर पंगडाचें जैत वा हार निंबून आसा. पंजाबा वतीन धवन 28 मॅची खेळ्ळा. तातंतल्या 11 मॅचींनी तो 20 धांवड्यां परस उण्या स्कोराचेर बाद जाला आनी हातूंतल्या 10 मॅचींनी पंजाब किंग्स हारला. धवन 20 धांवड्यां परस उण्या स्कोराचेर बाद जाल्या उपरांत ताचो पंगडाची जैताची टक्केवारी फकत 9 इतकी उरल्या. धवनान 17 मॅचींनी 20 धांवड्यां परस चड धांवड्यो केल्यात. आनी हातूंतल्या 11 मॅचींनी पंजाबान जैत जोडलां. धवनान 20 धांवड्यां परस चड धांवड्यो केल्या उपरांत पंजाबाची जैताची टक्केवारी 65 इतकी आसा.
शुभमन गिलान पंजाब किंग्सा आड 10 डावांनी 56.71चे सरासरीन सुमार 140 चे स्ट्रायक रेटीन 397 धांवड्यो केल्यात. खंयच्याय पंगडा आड चारा परस चड डावांनी खेळ्ळ्या उपरांत ही गिलाची सगल्यांत चड सरासरी आसा. लखनौ सुपर जायण्ट्सा आड चार डावांनी 78.50 चे सरासरीन धांवड्यो केल्यात. गिलान पंजाबा आड पांच खेपे 50 परस चड धांवड्यो केल्यात. गुजरात टायटन्सा वतीन खेळटना गिलान पंजाबा आड 96, 9 आनी 67 धांवड्यो केल्यात.
गुजरात टायटन्स स्पिन विभागाक बरे तरेन तोंड दिता. पूण, फास्ट विभागा आड गडबड जाता. स्पिनर्सा आड गुजरात टायटन्सान 54.3 चे सरासरीन 150 परस चड स्ट्रायक रेटीन धांवड्यो केल्यात. जाल्यार फास्ट बॉलरां आड ताणें फकत 22.5चे सरासरीन आनी 116चे स्ट्रायक रेटीन धांवड्यो केल्यात. अंदूंच्या हंगामांत खंयच्याय पंगडाची स्ट्रायक रेट फास्ट बॉलरां आड 140 परस उणी ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
