भांगरभूंय | प्रतिनिधी
इंडीयन प्रिमीयर लिगेंत (आयपीएल) आयज येजमान पंजाब किंग्स आनी सनरायझर्स ह्या पंगडां मदीं जातली. दोनूय पंगडांची जैताची लय कायम राखपाचो यत्न आसतलो.
पंजाबाचो मुखेली शिखर धवन हो हैदराबादाच्या जयदेव उनाडकटा आड धांवड्यांचो पावस घालता. ताका लागून जयदेव आनी धवन हांचे मदलो संघर्श टाळपाचो हैदराबादाचो मुखेली पॅट कमिन्साचो यत्न आसतलो. आयपीएलांत धवनान जयदेवाच्या 44 बॉलांक तोंड दिलां आनी 159चे स्ट्रायक रेटीन 70 धांवड्यो केल्यात. जाल्यार धवनाक बाद करपाक जयदेवाक फकत एकदाच येस आयलां.
पंजाबाच्या ओपनरांचे जोडयेक शक्य तितले बेगीन तंबूंत धाडपाची जापसालदारकी स्वता कमिन्स आनी भुवनेश्वर कुमाराचेर आसतली. जयदेवा आड धवन 159चे स्ट्रायक रेटीन धांवड्यो करता. पूण, भुवनेश्वरा आड ताची स्ट्रायक रेट देंवन 105 इतकी जाता. भुवनेश्वरा आड 74 बॉलांक तोंड दितना धवनान 78 धांवड्यो केल्यात. जाल्यार दोन खेपे बाद जाला.
धवनाचो जोडिदार जॉनी बॅयरस्टोक तंबूंची वाट कमिन्स दाखोवपाक शकता. कमिन्सान बॅयरस्टोक आयपीएलांत दोन खेपे बाद केला. जाल्यार बॅयरस्टोन ताच्या आड 25 बॉलांनी फकत 16 धांवड्यो केल्यात.
अभिषेक शर्मान फाटले मॅचींत ताबडतोड बॅटींग करून पावरप्लेंतूच चेन्नय सुपरकिंग्साची हार निश्चीत केल्ली. पंजाबाच्या पंगडांत लेगीत अभिषेक शर्माक नाकापुरो करपाक शकता असो कोण ना. अर्शदीप सिंगा आड अभिषेकान 155.6चे स्ट्रायक रेटीन धांवड्यो केल्यात. हर्षल पटेलान अभिषेकाक एकदा बाद केला. पूण, हर्षल सध्या फॉर्मांत ना. अभिषेका मुखार राहुल चाहराक हाडलो जाल्यार पंजाबाक फायद्याचें थारुये. राहुलान अभिषेका आड फकत 10 बॉल घाल्यात. पूण दोन खेपे ताका बाद लेगीत केला.
एडेन मार्करमान चेन्नय सुपरकिंग्सा आड जैत जोडपाक म्हत्वाची भुमिका वठयिल्ली. अभिषेका भशेन मार्करमाचे पंजाबाच्या चडश्या बॉलरां आड रॅकॉर्ड बरो आसा. पूण, अभिषेका भशेन राहुला आड खेळटना तो गडबडटा. राहुला आड 24 बॉल खेळटना ताणें 24 धांवड्योच केल्यात. जाल्यार एकदा बाद जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
