भांगरभूंय | प्रतिनिधी
कंत्राटी कामगारांक कायम करपाचो प्रस्ताव ना
पणजी, प्रतिनिधी : पंचायतीत ग्रामीण उदरगत प्राधिकरणा (आरडीए) खाला ज्या ग्राम रोजगार साहाय्यकांची नेमणुक जाल्या, तांची नोकरी सध्या तरी कंत्राटीच स्वरूपाची उरतली. तांकां नोकरेत कायम करपाचो सध्या तरी प्रस्ताव ना, अशी लेखी जाप ग्रामीण उदरगत प्राधिकरणाचे मंत्री गोविंद गावडे हांणी दिली. आमदार क्रुज सिल्वा हांणी हो लेखी प्रस्न विचारिल्लो.
गांवगिऱ्या वाठारांत वा पंचायतींनी ग्रामीण उदरगत प्राधिकरणा वरवीं तरेकवार येवजणेंचीं कामां जातात. मनरेगा खाला जावपी कामांचो सुद्दा नियाळ दवरचो पडटा. हाका लागून पंचायती कडल्यान ग्राम रोजगार साहाय्यकांची नेमणुक जाता. आतां मेरेन १५ पंचायतींनी ग्राम रोजगार साहाय्यकांची नेमणुक जाल्या. तांकां म्हयन्याक २१ हजार ११६ रूपया पगार दितात. सगळ्यांची नेमणुक डिसेंबर २०२१ वर्सा जाल्या. सगळ्या ग्राम रोजगार साहाय्यकां कडेन दुसऱ्या पंचायतीचो ताबो आसा.
सध्या शिवोले/ सडये, पिळर्ण, हडफडे, आसगांव, पर्रा, हणजुणां, थिवें, कळंगुटे/ गिरी, सुकूर, नार्वे, कुठ्ठाळें, वाडी तळावली, फातर्पें, बाणावले, आगोंद ह्या पंचायतींनी ग्राम रोजगार साहाय्यकांची नेमणुक जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
