भांगरभूंय | प्रतिनिधी
कोरगांव, बातमीदार: पेडणें पुलिसांनी काल रातच्या वेळार न्हंयबाग हांगा ४ लाख ३५ हजार रुपयांचो सोरो धरलो. ह्या प्रकरणांत पुलिसांनी मिनी पिकअप ताब्यांत घेवन अजित सुखदेव कांबळे (२६, रा. सानेगुरुजी वसणूक, कोल्हापूर) हाका अटक केली. हे मिनी पिकअपची किंमत ६ लाख रुपया जाता.
पेडणें पुलीस निरीक्षक सचिन लोकरे हे काल रातीं गस्तीचेर आसतना (एम एच-४३ , बी एक्स-१६२०) मिनी पिकअप महाराष्ट्राच्या दिकेन वतना तिणें ती आडावन तपासणी केली. तपासणे वेळार पिकपींत सोरो आशिल्ल्याचें समजलें. हे संबंदी पेडणें पुलिसांनी चालका कडेन सोरो येरादारी करपाचो परवानो मागलो तेन्ना तो ताचे कडेन नाशिल्लो. धरिल्ल्या सोर्यांत गोल्डन एस ब्ल्यू फायन व्हीस्कीची ७५ बॉक्सां, तातूंत दरेकी बाटलेंत ७५० मिलिलीटर व्हिस्की मेळून वट्ट ६५७ लिटर व्हीस्की जाल्यार ब्लॅक अँड ब्लॅक रमचीं ७२ बॉक्सां सांपडल्यां. सगळें मेळून १,३०५ लिटर सोरो जाता.
पेडणें पुलीस निरीक्षक सचिन लोकरे हांचे सयत उपनिरिक्षक योगेश मांद्रेंकार, सहाय्यक उपनिरीक्षक आनंद परब आनी हेर पुलिसांनी ही मोहिमेंत वांटो घेतलो. उपरांत धरिल्लो बेकायदेशीर सोरो अबकारी कार्यालया कडेन दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
