भांगरभूंय | प्रतिनिधी
न्युझिलॅण्डाचे भोंवडेर आशिल्ल्या बांगलादेशान तिसरे वन डे मॅचींत येजमान पंगडाक जबरदस्त धपको दिलो. बांगलादेशाच्या बॉलरांनी उत्कृश्ट प्रदर्शन करून न्युझिलॅण्डाचो डाव फकत 98 धांवड्यांचेर सोंपयलो. ते उपरांत बांगलादेशाच्या बॅट्समनांनी 99 धांवड्यांची मोख 1 विकेट वगडावन फकत 15.1 ओव्हरींनी मेळयली. पूण, पयल्यो दोन मॅची न्युझिलॅण्डान जिखिल्ल्यान ताणें ही माळ 2-1 अशा फरकान आपल्या बोल्सांत उडयली.
बांगलादेशान टॉस जिखून पयलीं फिल्डिंग करपाचो निर्णय घेतल्या उपरांत तंझीम हसन शाकिब आनी शोरीफुल इस्लाम हांचे बॉलिंगे मुखार न्युझिलॅण्डाच्यो विकेटी गडगडल्यो. ह्या दोगांयनी एका फाटल्यान एक धपको दिल्ल्यान न्युझिलॅण्डाची स्थिती एका वेळार 6 बाद 70 अशी जाल्ली. ते उपरांत अश्टतासांचो खेळगडो सौम्या सरकारान तीन विकेटी घेत न्युझिलॅण्डाची स्थिती गंभीर केली. मुस्तफिजूर रहमानान अखेरची विकेट घेत न्युझिलॅण्डाचो डाव 98चेर सोंपयलो.
मोखीचो फाटलाव करतना सौम्या सरकार 4 धांवड्यो करून रिटायर्ड हर्ट जालो. पूण, अनामूल हक (37) आनी नजमूल हुसेन शांतो (नाबाद 51) हांणी 69 धांवड्यांची भागिदारी करून बांगलादेशाचें जैत निश्चीत केलें. जैताच्या हुमऱ्यार आसतना अनामूल हक बाद जालो. अखेरेक शांतो आनी लिटन दास हांणी आनीक विकेटी पडपाक दिल्यो ना आनी जैत निश्चीत केलें. तंझीम हसन शाकिबाची मॅन ऑफ द मॅच पुरस्कारा खातीर निवड जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
