भांगरभूंय | प्रतिनिधी
येजमान न्युझिलॅण्ड आनी श्रीलंका ह्या पंगडां मदीं हांगाच्या बेसीन रिझर्व्ह मैदानाचेर दुसरी टॅस्ट चालू आसा. न्युझिलॅण्डान दुसऱ्या दिसा 2 बाद 155 धांवड्यां वयल्यान मुखार खेळपाक सुरवात केली आनी 4 बाद 580 धांवड्यांचेर आपलो डाव घोशीत केलो. ते उपरांत दुसऱ्या दिसाचो खेळ सोंप मेरेन श्रीलंकेन 2 विकेटी वगडावन 26 धांवड्यो केल्यात.
न्युझिलॅण्डा वतीन केन विलियम्सनान सगल्यांत चड 215 आनी हॅन्री निकोल्सान नाबाद 200 धांवड्यो केल्यो. धांवड्यांचो फाटलाव करपी श्रीलंकेची सुरवात बाबत जाली. ओशदा फर्नांडो स धांवड्यो करून बाद जालो. मॅट हॅन्रीच्या बॉलाचेर टॉम ब्लंडेलान कॅच धरली. जाल्यार कुशल मॅण्डीस खातें उगडिनासतनाच तंबूंत परतलो. डग ब्रेसवेलाच्या बॉलाचेर डॅव्हॉन कॉन्वेन कॅच धरली. दुसऱ्या दिसाचो खेळ सोंपलो त्या वेळार दिमुथ करुणारत्ने 16 आनी प्रभात जयसुर्या 4 धांवड्यो करून खेळपट्टीचेर आशिल्लो.
मजगतीं, विलियम्सन आनी निकोल्स हांणी दोट्टी शेकडे मारपा खेरीत 363 धांवड्यांची भागिदारी केली. विलियम्साचो हो 28 टॅस्ट शेंकडो थारलो. ताणें 296 बॉलांनी 23 चवके आनी दोन सके मारले. निलोक्सान 240 बॉलांनी नाबाद 200 धांवड्यो केल्यो. हातूंत 15 चवक्यांचो आनी चार सक्यांचो आस्पाव आसा. विलियम्सनान सेगीत तिसरो शेंकडो मारलो. ताणें श्रीलंके आडचे पयले टॅस्टींत आनी ताचे पयलीं इंग्लंडा आड शेंकडो मारिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
