न्युझिलॅण्डाचो खर प्रतिकार

भांगरभूंय | प्रतिनिधी

केन विलियम्सनान (104) भारताच्या विराट कोहलीच्या टॅस्ट शेंकड्यांची बरोबरी केली. विलियम्सनान काल येजमान बांगलादेशा आड चालू आशिल्ले पयले टॅस्टीच्या पयल्या डावांत कारकिर्दींतलो 29वो शेंकडो नोंदयलो. अंदूंचो ताचो हो चवथो शेंकडो थारलो. विलियम्सन 2023त सगल्यांत चड टॅस्ट शेंकडे मारपी बॅट्समन थारलो. ताणें सेगीत तिसरो शेंकडो मारलो.

विलियम्सनाच्या शेंकड्याक लागून न्युझिलॅण्डान दुसऱ्या दिसाचो खेळ सोंप मेरेन 8 विकेटी वगडावन 266 धांवड्यो केल्यात. कायल जेमिसन 7 आनी टिव सावथी 1 धांवडीचेर खेळटा. ते पयलीं बांगलादेशाचो पयलो डाव पयल्या सत्रांत 310चेर सोंपलो.

विलियम्सना खेरीत ग्लॅन फिलिप्सान 42 आनी डॅरिल मिचेलान 41 धांवड्यांचें योगदान दिलें. हेर बॅट्समनांक व्हड खेळी करपाक जमली ना. न्युझिलॅण्डान 36 धांवड्यांचेर टॉम लॅथमाच्या रुपान पयली विकेट पडली. लॅथमान 21 धांवड्यो केल्यो. ते उपरांत डॅव्हॉन कॉन्वे (12) बाद जालो. त्या वेळार न्युझिलॅण्डाच्यो 44 धांवड्यो जाल्ल्यो.

50 धांवड्यां भितर दोनूय ओपनर तंबूंत परतून गेल्या उपरांत विलियम्सनान सगलीं सुत्रां आपल्या हातांत घेतलीं. ताणें हॅन्री निकोलसा वांगडा 54 धांवड्यांची भागिदारी केली. पूण, ही भागिदारी चड वगत तिगूंक ना. निकोलस 19 धांवड्यो करून बाद जालो. ते उपरांत विलियम्सनान डॅरिल मिचेला वांगडा मेळून डाव मुखार व्हेलो. पूण, मिचेल 41 धांवड्यो करून बाद जालो. बाद जावचे पयलीं ताणें विलियम्सना वांगडा 66 धांवड्यांची भागिदारी केली. विलियम्सनान ते उपरांत फिलिप्सा वांगडा 78 धांवड्यांची भागिदारी केली. विलियम्सन बाद जालो त्या वेळार न्युझिलॅण्डान 262 धांवड्यो केल्ल्यो.

बांगलादेशा वतीन स्पिनर तैजुल इस्लामान 4 विकेटी घेतल्यो. ताणें लॅथम, मिचेल, विलियम्सन आनी ईश सोधी हांकां तंबूची वाट दाखयली. तैजुला खेरीत शोरिफुल इस्लाम, मेहदी हसन मिराज, नईम हसन आनी मोमिनूल हक हाका एकेक विकेट फावो जाली.

मजगतीं, बांगलादेशाचो आपलो पयलो डाव 310 धांवड्या वयल्यान सुरवात केली. पूण, दिसाच्या पयल्याच बॉलाचेर ताणें आपली निमाणी विकेट वगडायली. टिम सावथीन शोरिफुल इस्लामाक बाद केलो. इस्लाम 13 धांवड्यांचेर बाद जालो.

न्युझिलॅण्डा वतीन ग्लॅन फिलिप्सान 4 विकेटी घेतल्यो. कायल जेमिसन आनी अजाज पटेल हाका 2-2 विकेटी फावो जाल्यो.