भांगरभूंय | प्रतिनिधी
मांद्रें पुलिसां आड अवमान याचिका; बापायक केल्ली मारपेट
म्हापशें: सातचे भाटलें. मांदऱ्यां आपल्या जाण्ट्या बापायक मारपेट केल्ल्याच्या आरोपा खाला अटक केल्लो दुबावीत समीर अंकूश हळदणकार (46) हाची पेडणें न्यायालयान जामिनार सुटका केली. जाल्यार जमीन अर्जा संबंदी पुलिसांनी आपलें म्हणणें न्यायालयांत सादर करपाक वेळ काडिल्ल्यान दुबावितान मांद्रें पुलिसां आड अवमान याचिका दाखल केल्या.
ही घडणूक 11 वेर सकाळीं 9.45 वरांच्या सुमाराक घडिल्ली. ह्या प्रकरणांत दुबाविताचो बापूय अंकूश रामा हळदणकार (75) हांणी मांद्रें पुलिशेंत कागाळ दाखल केल्ली. दुबावितान आपल्या बापायक कोण्यान मारपेट केल्ली. कागाळ दाखल केले उपरांत पुलिसांनी दुबाविताक 12 फेब्रुवारी दिसा अटक केल्ली.
अटक केले उपरांत दुबावितान जामिना खातीर पेडणेंच्या पयलो वर्ग न्यायालयांत जामीन अर्ज केल्लो. बिरेस्तारा 15 वेर न्यायालयान दुबाविताची 15 हजारांची हमी रक्कम आनी हेर अटी प्रमाण सशर्त जामिनार सुटका केली. अर्जदाराचे वतीन न्यायालयांत अॅड. प्रथमेश कोरगांवकारान युक्तीवाद केलो.
मजगतीं, दुबावीत समीर हळदणकारान 13 वेर जामिना खातीर पेडणेंच्या न्यायालयांत अर्ज केल्लो. ह्या अर्जा वेले सुनावणे वेळार 14 वेर पुलिसांनी आपलें म्हणणें सादर करपाचो आदेश पुलिसांक दिल्लो.
पूण पुलिसांनी न्यायालयांत आपलें म्हणणें सादर करपाक वेळ काडिल्ल्यान आनी एका दिसा उपरांत 15 वेर ते सादर करून न्यायालयाचो अवमान केलो असो दावो करून दुबावितान मांद्रें पुलिसां आड अवमान याचिका दाखल केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
