भांगरभूंय | प्रतिनिधी
चेन्नय, खबरां संस्थाः सर्वोच्च न्यायालयाची न्यायाधीश बीव्ही नागरत्ना हांणी नोट बंदीचेर प्रस्न हाजीर केला. नोटबंदी उपरांत सामान्य लोकांचे हाल पळोवन म्हाका दुख्ख जाता अशें तिणें सांगलें.
न्या. नागरत्ना हांणी म्हणलें, ८ नोव्हेंबर २०१६ दिसा कितें घडलें तें आमकां सगळ्यांक खबर आसा. तेन्ना ८६% चलन ५०० आनी १००० रुपयाच्या स्वरुपांत आशिल्लें. कल्पना करात एका मजुराची, जाका दिसपट्ट्या गरजे खातीर नोटी अदलाबदल करच्यो पडटाल्यो. हाचे उपरांत ९८% चलन परत मेळ्ळें. मागीर काळो पयसो ना करप (जें तांचें ध्येय आशिल्लें) हाचें कितें जालें? देखून म्हाका दिसलें (त्या वेळार) काळ्या पयशांचें रुपांतर धव्या पयशांत करपाचो हो एक बरो मार्ग आशिल्लो, जाका लागून बेनामी रोख वेवस्थेंत आयली. हाचे उपरांत आयकराचे कार्यवाहीचें कितें जालें तें आमकां खबर ना. जे तरेन नोटबंदी केल्ली ती पद्दत योग्य नाशिल्ली. कांय लोकांचें म्हणणें आसा, तेन्नाचे अर्थमंत्र्यांकूय हाची खबर नाशिल्ली. न्या. नागरत्ना नालसार युनिव्हर्सिटी ऑफ लॉ हांगा ‘न्यायालय आणि संविधान’ परिशदेंत उलयताली.
तिणें फुडें म्हणलें, एका सांजवेळार अचकीत आदेश जारी जालो आनी नोटबंदी जाली. भारतान कागदी चलना वयल्यान प्लास्टीक चलनाचेर वचचें अशें म्हाका दिसलें. मात नोटबंदी हें ताचें कारण नक्कीच आसपाक शकना हें निश्चीत. तोखणाय करपा सारकी गजाल म्हणल्यार फाटल्या वर्सा जानेवारींत सर्वोच्च न्यायालयाच्या पांच न्यायाधीशांच्या खंडपिठान नोटबंदीचो निर्णय ४- १ असो कायम दवरिल्लो. त्या खंडपिठाची वांगडी आशिल्ली न्या. नागरत्ना नोटबंदी अघटीत अशें जाहीर केलें. तशेंच सर्वोच्च न्यायालयाचे आदले न्यायाधीश एस रवींद्र भट, तेलंगण उच्च न्यायालयाचे मुखेल न्यायाधीश अलोक आराधे, नेपाळ सर्वोच्च न्यायालयाची न्यायाधीश सपना मल्ला आनी पाकिस्तान सर्वोच्च न्यायालयाचे न्यायाधीश सय्यद मंसूर अली शाह हांणीय ह्या कार्यावळींत आपले विचार मांडले.
राज्यां आनी राज्यपालां मदल्या वादाचेर न्यायमूर्ती नागरत्ना हांणी ह्या वेळार हुस्को उक्तायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
