भांगरभूंय | प्रतिनिधी
पणजी ः सरकारी नोकरी दिवपाचें हांयस दाखोवन फटोवपी प्रकरणांनी दिसांन दीस बरीच वाड जायत आसा. ह्या प्रकरणांनी सद्दां नवीं नांवां मुखार येत आसात. सरकारी नोकरी दिवपाचें हांयस दाखोवन सुमार 1.21 कोटी रुपयांची तोपी घालपाच्या प्रकरणांत मुखेल दुबावीत श्रुती प्रभुगांवकार (पर्वरी) हिका फोंडें पुलिसांनी ताब्यात घेवन तिची चवकशी सुरु केल्या. मजगतीं, ती एका राजकी पक्षा कडेन संबंदीत आसा, अशी म्हायती मेळ्ळ्या.
ह्या प्रकरणांत सोमारा पुलिसांनी अटक केल्ल्या योगेश शेणवी कुंकळ्ळीकार ह्या शिक्षका कडले हे पयशे श्रुती कडेन पावल्यात हें कळ्ळें उपरांत पुलिसांनी तिका ताब्यांत घेतल्या.
मजगतीं, हाचे आदीं पूजा नायक, दीपश्री सावंत हांच्यो नोकरी भानगडी उक्ताडार जाले उपरांत आतां श्रुती प्रभु गांवकार हिचें नांव ह्या प्रकरणांत मुखार आयलां. श्रुती आनी योगेश शेणवी कुंकळ्ळीकार ह्या दोगांयनी जायत्या जाणांक सरकारी नोकरी दिवपाचें हांयस दाखोवन तांचे कडल्यान सुमार 1.21 कोटीं परस चड रक्कम घेतिल्याचो दुबाव आसा. एके शाळेंत शिक्षक आशिल्ल्या कुंकळ्ळीकार हाणें ही रक्कम श्रुती कडेन दिली. ह्या प्रकरणांत कुंकळ्ळीकार हाका अटक जाले उपरांत श्रुती हिचें सत्य भायर सरलें अशी म्हायती सूत्रांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
