भांगरभूंय | प्रतिनिधी
पणजी, बातमीदार ः राज्यांतलो खाजगी अभ्यासक्रम शिकोवपी कांय संस्था विद्यार्थ्यांक नोकरी दिवपाचीं फट आस्वासनां दितात. अशा संस्थांचेर खर कारवाय करतले अशी शिटकावणी मुख्यमंत्री डॉ. प्रमोद सावंत हांणी दिल्या. शेनवारा तांणी राज्यांतल्या स्वयंपूर्ण इश्टांक व्हर्च्युअल पद्दतीन संबोधीत केलें. ह्या वेळार ‘स्वयंपूर्ण गोंय’ खाला शेतकी आनी शिक्षण खात्याचेर भर दितात अशेंय मुख्यमंत्र्यान स्पश्ट केलें. शेतकी संचालक संदीप फळदेसाय, शिक्षण संचालक शैलेश झिंगडे हांचे सयत वेगवेगळ्या गांवांचे पंच, सरपंच, अधिकारी व्हर्चुअल पद्दतीन कार्यावळींत हाजीर आशिल्ले.
खाजगी अभ्यासक्रम शिकोवपी संस्थां नोकरी दिवपाचीं आस्वासनां दितात. हे खातीर कांय विद्यार्थी रीण घेवन मुद्दाम अशे अभ्यासक्रम शिकतात. पूण अभ्यासक्रम पुराय जाल्या उपरांत तांकां नोकरी मेळना. अशी फटवणूक आडावपा खातीर खाजगी अभ्यासक्रम दिवपी सगल्या संस्थांची तपासणी करपाचो आदेश शिक्षण खात्याक दिला. अशो संस्था वा तांचे अभ्यासक्रम शिक्षण खात्या कडेन जोडिल्ले आसात काय ना, खात्याची परवानगी आसा काय ना, तें खात्या वतीन तपासतले, अशें डाॅ. सावंत हांणी सांगलें.
खाजगी अभ्यासक्रम घेवचे पयलीं विद्यार्थ्यांनी ह्या अभ्यासक्रमाक मान्यताय मेळ्ळ्या काय ना, हाची खात्री करची अशेंय तांणी सांगलें. सरकारी आयटीआयंत अशें तरेचे अभ्यासक्रम आसात जाल्यार तांकां प्राधान्य दिवचें. आयटीआयत उण्या खर्चांत बऱ्या दर्ज्याचें शिक्षण उपलब्ध आसा. कांय विद्यार्थ्यांक वेळार योग्य करियर सल्लो मेळूंक नाशिल्ल्यान तांचें लुकसाण जाता. हें टाळपा खातीर स्वयंपूर्ण इश्टांनी विद्यार्थ्यांक करियर मार्गदर्शन दिवचें. तांचे संबंदीत येवजण्यो विद्यार्थ्यां कडेन पावोवपाचें काम करचें. योग्य करियर केल्यार राज्यांतच जायत्यो रोजगार संदी मेळटल्यो अशेंय मुख्यमंत्र्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
