भांगरभूंय | प्रतिनिधी
मडगांव, प्रतिनिधी ः परदेशांत नोकरी दिवपाच्या निमतान अर्थीक फटवणूक करपाचे प्रकार दक्षीण गोंयांत वाडत आसात. मायणा कुडकरी वाठारांतल्या एका तरणाट्याक भारतीय दूतावासाच्या मजतीन म्यानमार शिमे वयल्यान येसस्वीपणान हाडला. नोकरीचें फटीचें हांयस दाखोवपी प्रकारांक बळी पडचें न्हय, खात्री केले बगय कांयच करचें न्हय असो उलो दक्षीण गोंय जिल्हो पुलीस अधीक्षक सुनीता सावंत हांणी मारलां.
मायणा कुडटरी वाठारांतली पूनम वाघ हांचो घोव आशीष वाघ हांका परदेशांत नोकरी दिता अशें सांगून म्यानमार शिमेचेर आनी फुडें अनवळखी सुवातेर व्हेलें. थंय तांकां शारिरीक आनी मानसीक त्रास जाले. आर्ले रायच्या पूनम वाघ हांणी दाखल केल्ले कागाळी प्रमाण मडगांव ओल्ड मार्केट वाठारांतल्या हेझेल फर्नांडीस हांणी आशीष वाघ हाका परदेशांत डेटा एंट्री ऑपरेटर म्हणून नोकरी दिता अशें सांगलें. उपरांत तांकां नोकरी दिवपाच्या निमतान म्यानमार शीमे लागसार धाडलो, मागीर थंयच्यान आशीषाक अनवळख्या सुवातेर व्हेलो. थंय ताका भारतीय आनी हेर नागरिकां वांगडा बनावट बिटकॉयन कंपनींत काम करपाक लायलें. थंय मानसीक आनी शारिरीक त्रासूय दिलें.
हे संबंदीं पुलिशेंत कागाळ नोंद केली. ते उपरांत दक्षीण गोंयची पुलीस अधीक्षक सुनीता सावंत हांणी हे संबंदी भारतीय दूतावासा कडेन संपर्क केलो. ते उपरांत म्यानमार आनी थायलंडांतल्या भारतीय दूतावासां कडेन संपर्क करुन हें विशींची म्हायती दिली. फॉलोअप जाले उपरांत ते कागदपत्रांचेर प्रक्रिया करून थायलंड दूतावासाच्या मजतीन आशीष वाघ हांका गोंयांत हाडपाक येस आयलें.
नोकरीच्या निमतान तरणाट्यांक दुसऱ्या देशांत व्हरून त्रास दितात म्हणून तरणाट्यांक बनावट रोजगार संदी विशीं जाणविकाय आसूंक जाय. कसल्याच फट आनी चड अर्थीक फायद्याक लागून आपलो जीव धोक्यांत घालचो न्हय असो उलो सुनीता सावंत हांणी मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
