भांगरभूंय | प्रतिनिधी
येजमान नॉर्थइस्ट युनायटेड एफसीन फॉर्मांत आशिल्ल्या एफसी गोवाक 1-1 असो बरोबरींत आडायलो. मॅच बादाबाद उरिल्ल्यान सध्या तरी गुणतकट्यांतले पयले सुवातेर पावपाचें एफसी गोवाचें सपन भंगलें.
हांगाच्या इंदिरा गांधी अॅथलेटीक स्टेडियमाचेर जाल्ले मॅचींतले दोनूय गोल पयल्या अर्दांत पांच मिनटांच्या फरकान पडले. नॉर्थइस्ट युनायटेड एफसीन मॅचींत बरोबरी सादली आसली तरी बॉलाचेर नियंत्रणा सयत पासींग अचुकतायेंत एफसी गोवान आपलो शेक दवरलो. ताणें पांच पॅनल्टी कॉर्नर मेळयले. जाल्यार येजमान पंगडाक एकूय पॅनल्टी कॉर्नर दिलो ना.
सुरवातीक 4-2-3-1 अशा फॉरमॅशनांत खेळपाक पसंती दिवपी एफसी गोवान 20व्या मिनटाक खातें उगडलें. नोह सदाओईच्या उत्कृश्ट क्रॉसाचेर कार्लोस मार्टिनेझान उजव्या कॉर्नरान हेडरा वरवीं बॉल जाळांत घालो. ह्या वेळार नॉर्थइस्ट युनायटेडाचो गोलकीपर मिचू हाचे सयत ताणें बचाव फळयेक मातूय संद दिली ना. पूण, घरच्या मैदानाचेर खेळटना येजमान पंगडान स मिनटांच्या फरकान प्रती हल्लो केलो. हो गोल जिथिन मदाथिल सुब्रनान केलो.
एफसी गोवाक अंदूंच्या हंगामांत तिसरे खेपे बरोबरीचेर समाधान मानचें पडलें. हे मॅची उपरांत एफसी गोवा गुणतकट्यांत दुसरे सुवातेर पावलो. ताणें ओडिशा एफसीक फाटीं घालो. दोनूय पंगडांचे दरेकी 24 गूण आसात. पूण गोलफरकाच्या आदाराचेर एफसी गोवा दुसरे आनी ओडिशा तिसरे सुवातेर आसा.
दुसरी नॉर्थइस्ट युनायटेडाची ही सवी मॅच बादाबाद उरली. 12 गुणां सयत तो गुणतकट्यांत सवे सुवातेर आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
