भांगरभूंय | प्रतिनिधी
मडगांव, प्रतिनिधी : नेसायचे मिनिनो फर्नांडीस हांच्या घरा मुखावेले उक्ते सुवातेर पार्क केल्ल्या दोन मोटार सायकलींक उजो लागलो. तो दुबावितांनी लायिल्ल्याचो आरोप मिनिनो हांणी केला. हे घडणुकेंत सुमार १.२० लाखांचें लुकसाण जालां.
मिनिनो हांणी, बिरेस्तारा रातच्या सुमार १०.४५ वरांचेर घराचे वयले माळयेर काम करतना सुणे भोंकता तें आयकून जनेल उगडलें. तेन्ना एक व्यक्ती घरा मुखार दोन चाकीचेर पेट्रोल ओत्ताली. ताका विचारपाक वतना तांणी त्या दोनूय दोनचाकींक उजो लायलो आनी थंयच्यान पळ काडलो. उपरांत पुलीस आनी उजो पालोवपी दळाक हे विशीं म्हायती दिली. पुलिसांनी जबाब नोंद केला. आतां कागाळ दितले. आपूण गांवच्यो विंगड विंगड समस्या सरकार दरबारांत मांडटा. तशेंच मुखारचे मेकळे सुवातेचीय केश चलता. ह्याच वादांतल्यान हें घडिल्ल्याची शक्यताय आसा, अशें मिनिनो हांणी सांगलें. हे उज्याचे घडणुकेंत घराच्या फुडल्या भागाचेंय लुकसाण जालें. उजो पालोवपी दळाचे जवान येवचे पयलीं कामगारांनी उजो पालोवपाचो यत्न केलो आनी जवानांनी उरिल्लो उजो पालयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
