नेवऱ्यो, पाट, लाटफळीं आपयतात समेस्तांक….

भांगरभूंय | प्रतिनिधी

इमेजिन पणजी

नवनिर्मणेतले पणजेत नेवऱ्यो, पाट, लाटफळीं सहकार भांडार, मॅगसन्स हेर दुकानां मेरेन पावल्यांत तींय चवथीच्या 15 दीसआदींच. 15 आॅगस्टांक समेस्तांक येवकार दितना आदल्यो परंपरा कुशीक दवरत पणजी मुखार वता,  शांतीकायेचो, सादूर रावपाचो उलो मारता, दुकानांनी आपयता. 

नवनिर्मणेंत वतना एका तेंपार रातीं आठ वरांचेर दुकानां बंद जावपी पणजेंत बाजारय उसरां मेरेन गिरायक करता. रक्षाबंधनाच्या राखी वांगडा रांगोळी, आरतीची खासा ताटांच न्हय अश्टमी खातीर फोव, आंबाडे, मयंडोळी केळीं बाजारांत आयल्यात. माणकुल्यां पासत राधा कृष्णाचे भेस, मुकुट, मणयांच्यो माळो, हार घेवपाकय बाजार आयताराय उगतो आसता.     

अस्तुऱ्यांच्या भांडारांनी नेवऱ्यो, लाडू, मोदक, फेणोऱ्यो, शेव- चिवड्याच्यो आॅर्डरी उपाट जाल्यात. एका तेंपार दुकानांनी फावट मारची पडटाली. आतां वाॅटसअॅप मेसेज धाडल्यार पणजेंत फळां- भाजी, खाणां- जेवणां, कड्डणां घरा पावतात. माटोळी घरां मेरेन पावोवपाची वेवस्था जाल्याच, त्या भायर स्वयंपूर्ण येवजणे खाला बाजार नवनिर्मणेतल्यान गोंयांक फुडें व्हरपाक येतात.

तंत्रगिन्यानान संवसार हाता लागीं हाडिल्लो आसलो तरी भोंवडेची मजा वेगळीच. पणजेंतलो नवो कांपाल पाॅयंट भोंवडेकारांक भावता, सेल्फी, नुस्तेमारी करतना त्याच पाॅयंटार माटोळेचो बाजार, अष्टमेची फेरी भरत व्हय?

तीस- चाळींस वर्सां आदीं पाट, लाटफळीं पणजे बाजारांत अष्टमी वेळारच मेळटालीं. वीस वर्सा आदीं इफ्फी येतना पणजे बाजारान नवें रुप घेतलें, दुकानांय बदललीं, बदलाच्या वाऱ्या बराबर पाट, लाटफळीं सदांच मेळटा आसलीं तरी चवथी आदीं नव्या रुपांत, रंगांत पाट, लाटफळीं येतात तांची उमळशीक वेगळीच. 

पणजेंतल्या सहकार भांडारांनी (मार्केट, जुंता हावस) दिसपट्टे गर्देचो त्रास जाता आसलो तरी गिरायक कमी जायना. वन स्टाॅप शाॅप म्हणून सहकार भांडारां, मॅगसन्स, विशाल माॅलान नामना जोडल्या. नवनिर्मणेत पाटो, मळ्यांरय माॅल्स वतलींच पूण सहकार भांडारांचे गिरायक दीस रात वाडटाच. एक सहकार भांडार पन्नासावो वाडदीसामेरेन पावतना बदलय जाल्यात पूण गिरायक शिस्त, सोंपेपणा सोदता.  अष्टमीचे फेरयेक माटोळी, मांडवी देग वीस वर्साआदीं मेळ्ळी पूण थंय आता नवनिर्मणेच्या वावराक नेट आयला. अष्टमीचे फेरयेतलें फर्निचर नासलें तरी लाटफळें लाटणी, चौरंग, पाटच न्हय जाल्यार आदोळ्योय सहकार भांडारांनी विकपाक आसात. तिखशो, गोडशो नेवऱ्यो, मोदक, शेव, चिवडो, बेसन लाडू, रव्याचे लाडू, फेणोऱ्यो, खाजीचे लाडू माशेल, दिवचल, फोंड्यांतल्यान पणजे पावतात.  

कांपाल पाॅयंटार अस्तुऱ्यांच्या भांडारांकय सुवात मेळ्ळ्यार कशें जातलें? सहकार भांडार पाट्यार, मळ्यांत, ताळगावात पावत व्हय? तशीं सुपरमार्केटस, सुपर सेंटर्स पणजे खातीर नवीं न्हय, अर्थकारणाक बळगें दितना महिला भवनां बांदावळीक पणजेंतच न्हय गोंयांत मुखेल शारांनी चालीक लागत व्हय?

आदले मुखेलमंत्री मनोहर पर्रीकर तेंय एक सपन आसलें, नवनिर्मणेत महिला भवन उबारपाचें. सपनां पळोवप सोपें, येवजण्यांच्यो घोषणाय सोंप्यो, पूण मुखार वतना आडमेळीं आसताच तरी फाटीं पळोवप नासता, जस्ट इमेजिन वाऱ्या पावसांत उडटना, बुडटना धांवपी पणजी. 

सुहासिनी प्रभुगांवकार