भांगरभूंय | प्रतिनिधी
रेंट अ कॅब – मोटरसायकल अपघातांत एकल्याक मरण
धनयाक सांगिनासतना नेण्ट्यां मॅकानिकान मोटार काडली भायर
भांगरभूंय । प्रतिनिधी
पणजी : गोवावेल्हा वाठारांत रेंट अ कॅब आनी स्प्लेंडर मोटरसायकल हांचे मदीं जाल्ल्या भिरांकूळ अपघातांत जनार्दन हरमलकार (49, रा. धारगळ पेडणें) ह्या मोटरसायकल चालकाक मरण आयलें. ही मोटार चलोवपी उणे पिरायेचो आशिल्ल्याचें कळ्ळां. ताका लागून उणे पिरायेच्या भुरग्याच्या हातांत मोटार कशी दिली, अशे प्रस्न उपस्थीत जातात.
मजगतीं, शुक्रारा सांजे वेळार हरमलकार हाचे कुडीचेर जीएमसींत पोस्टमार्टम केलो. ह्या प्रकरणांत आगशी पुलिसांनी वास्कोच्या 16 वर्सां पिरायेच्या भुरग्याक ताब्यांत घेतला.
बिरेस्तारा रातीं 11.30 वरांच्या सुमाराक हो अपघात जालो. हे संबंदांत मेळिल्ले म्हायती प्रमाण, कॅब आनी स्प्लेंडर मोटरसायकल ह्यो दोनूय गाडयो पणजे सावन मडगांवचे दिशेन वताल्यो. गोवा वेल्हा वाठारांतल्या बॅनेटॉन शोरुमा लागसार कॅबान पुडें वचपी मोटरसायकलीक नेटाचो धपको दिवन फरफटीत व्हेलो. ते परांत कॅबान लायटीच्या खांब्याक धपको दिलो. तातूंत मोटरसायकल चालक गंभीर जखमी जालो. ताका जीएमसींत व्हेलो, तेन्ना थंयच्या दोतोरांनी ताका मरण आयिल्ल्याचें घोशीत केलें. ह्या अपघातांत मोटरसायकल आनी कॅबाचें व्हड लुकसाण जालां.
अपघातांचें सत्र चालूच
रेंट अ कॅब, थार हांचे अपघात वाडल्यात. फाटल्या कांय दिसांनी खूबशे अपघात जाल्यात. तातूंत कितल्याश्याच जाणांक जीव वगडावचो पडला. हे फाटभुंयेर ह्यो गाडयो आनी ताका लागून घडपी अपघात हांचो प्रस्न साणीर आयला. इतलें आसून लेगीत उणे पिरायेच्या भुरग्याच्या हातांत रेंट अ कॅब दिलीच कशी, असो प्रस्न उपस्थीत जाला. ह्या प्रकरणांत खर कारवाय करपाची मागणी जाता. ह्या प्रकरणांत आगशी पुलीस स्टेशनाचे निरिक्षक अनंत गांवकार हांच्या मार्गदर्शना खाला उपनिरिक्षक जाकी हुसेन अदीक तपास करतात.
पासय थारली जिवघेणी
गोवा वेल्हा वाठारांत रेंट अ कॅब आनी स्प्लेंडर मोटरसायकल हांचे मदीं अपघात जाल्लो. रेंट अ कॅब चालक हो उणे पिरायेचो आसा. तो वास्को एके गॅरेजींत काम करता, अशी म्हायती मुखार आयल्या. गॅरेजीचे कुशीक रेंट अ कॅब धनयाचें वॉशींग सेंटर आसा. थंय राती धनयान मोटार पार्क केल्ली. तशेंच केन्ना केन्ना रेंट अ कॅबाक गिरायक येतात हे खातीर धनयान तिची चावी वॉशींग सेंटरांत दवरतालो. ही खबर त्या नेण्ट्या भुरग्याक आशिल्ली. ते प्रमाण त्या भुरग्यान चावी घेतली आनी रेंट अ कॅब घेवन पासय मारपाक वास्को सावन पणजेचे दिशेन आयिल्लो. पासय मारले उपरांत परतून वास्को वतना भिरांकूळ अपघात जालो. ह्या अपघातांत मोटरसायकल चालक जनार्दन हरमलकार हाका मरण आयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
