भांगरभूंय | प्रतिनिधी
पणजी : पणजी पुलिसांनी १५ वर्सां पिरायेचे मूळ नेपाळी नेण्टे चलयेच्या अपहरण प्रकरणांत मूळ ओडिशांतल्या १९ वर्सां पिरायेच्या तरणाट्यां आड गुन्यांव नोंद केला. हे विशीं पुलिसांनी तपास सुरू केला.
ह्या अपहरण प्रकरणां विशीं चड म्हायती दितना पणजे पुलिसांनी सांगलें, हे विशीं पिडेस्त चलयेचे आवयन कागाळ नोंद केल्या. ते प्रमाण १५ नोव्हेंबराक सकाळच्या ८ वरांचेर कागाळदाराचे नेण्टे चलयेचें ओडिशाच्या तरणाट्यान अपहरण केलें. दुबावीत आनी पिडेस्त चली एकेच इमारतींत वेगवेगळ्या बिराडांनी रावतात अशें कागाळेंत नमूद केलां. हाची दखल घेवन पणजी पुलीस निरीक्षक विजयकुमार चोडणकार हांच्या मार्गदर्शना खाला बायल उपनिरीक्षक रश्मिका कवळेंकार हांणी दुबावीत तरणाट्या आड भारतीय न्याय संहितेचें कलम १३७(२) आनी गोंय बाल कायद्याचें कलम ८ खाला गुन्यांव दाखल केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
