भांगरभूंय | प्रतिनिधी
म्हापशें, प्रतिनिधी ः मालिम जेटींतल्यान नुस्तेंमारी करपाक खोल दर्यांत गेल्लो बोटींतल्यान बेपत्ता जाल्लो ओडिशाच्या कामगाराचो खून जाल्ल्याचे उक्ताडार आयलां. ह्या प्रकरणांत वास्कोच्या हर्बर पुलिसांनी अनवळखी मनशा आड खूनाचो गुन्यांव नोंद केला. मेल्ल्या मानायाचें नांव पद्मलोचन सलीमा (20, ओडिशा) अशें आसून तो 8 तारखे सावन बोटीं वयल्यान बेपत्ता जाल्लो.
आयएनडी- जीए-01-एमएम-3487 क्रमांकाची ‘एस्टेला-II’ नांवाची नुस्तेंमारी बोट 8 तारखेक मालिम जेटींतल्यान खोल दर्यांत नुस्तेंमारी खातीर गेली. हे बोटींत कामगारां सयत 32 खलाशी आशिल्ले. ह्या कामगारां मदलो पद्मलोचन सलीमा हो रातच्या वेळार बोटींतल्यान बेपत्ता जालो. उपरांत बोटीचो धनी इशान डिसोझा हांणी 10 तारखेक पर्वरी पुलीस स्टेशनाचेर तो बेपत्ता जाल्ल्याची कागाळ दाखल केली. 12 जानेवारीक हर्बर पुलीस स्टेशनाच्या वाठारांत वास्को दर्यादेगेर ह्या कामगाराची कूड कुशिल्लें अवस्थेंत मेळ्ळी. पयलीं बोटीच्या धनयाक कुडीची वळख करुन घेवपाक आपयलें. पूण तो वळखुपाक शकलो ना. देखून मेल्ली कूड मडीं दवरपाच्या कुडींत दवरली आनी बेपत्ता जाल्ल्या कामगाराच्या बापायक आपयलो. ताचो बापूय आयले उपरांत ताच्या पांयाचेर आशिल्ल्या जल्मचिन्नांतल्यान बेपत्ता जाल्ल्या पद्मलोचनाची ही मेल्ली कूड आशिल्ल्याचे स्पश्ट जालें. वळख पटले उपरांत कुडीचो पोस्टमार्टम तपासणी केली. ताचो अहवाल 25 तारखेक पुलिसांक मेळ्ळो. पद्मलोचनाच्या छातीचेर खर मार जाल्ल्याचे दिसून आयलें. ह्या अहवालाचेर आदारीत वास्को हर्बर पुलिसांनी काल अनवळखी मनशाचेर खूनाचो गुन्यांव नोंद करून फुडली चवकशी सुरू केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
