नीट परिक्षेचो पेपर फुटिल्ल्यान गोंयच्या विद्यार्थ्यांचेर परिणाम जावचो ना: मुख्यमंत्री

भांगरभूंय | प्रतिनिधी

पणजी : गोंयचे उच्च शिक्षण घेतिल्ले चडशे विद्यार्थी गोंय वैजकी म्हाविद्यालयांत (गोमेकॉ) राज्य कोट्यांतल्यान प्रवेश घेतात. ताका लागून नीट परिक्षेचो पेपर फुटिल्ल्यान हांगाच्या विद्यार्थ्यांचेर व्हडलोसो परिणाम जावचो ना, अशें मुख्यमंत्री डॉ. प्रमोद सावंत हांणी सांगलें. हे विशीं आमदार कार्लोस फरेरा आनी हेर आमदारांनी लक्ष ओडून घेवपी सुचवण्यो हजर केल्ल्यो.
बुधवारा विधानसभेंत उलयतना मुख्यमंत्र्यान मुखार म्हणलें, जीएमसींत राज्य कोट्यांतल्यान फकत फकत गोंयच्या विद्यार्थ्यांक प्रवेश दितात. हे खातीर विद्यार्थ्यान राज्यांतल्यान १२ वी विज्ञान पास आसप आनी थारावीक काळा खातीर गोंयांत राविल्ले आसप गरजेचें. हाका लागून नीटच्या जाहीर केल्ल्या नव्या निकालाक लागून हांगाच्या विद्यार्थ्यांच्या करियराचेर वा प्रवेश प्रक्रियेचेर परिणाम जावचो ना. राज्यांतले फकत दोन ते तीन विद्यार्थी दिल्लींतल्या एम्स सारक्या व्हड संस्थेंत प्रवेश घेतात. अश्या विद्यार्थ्यांचेर पेपर फुटीक लागून मात्सो परिणाम जावपाक शकतात. हो विशय केंद्र सरकाराच्या अखत्यारीत आयिल्ल्यान राज्य सरकार हे विशीं कांयच करपाक शकना. केंद्र सरकार, एनटीए हे सध्या सर्वोच्च न्यायालयान दिल्ल्या निर्णया प्रमाण काम करता. केंद्र सरकारान प्रवेश प्रक्रियेचें वेळापत्रक जाहीर केले उपरांत राज्य सरकारचें उच्च शिक्षण संचालनालय एमबीबीएस , बीडीएस, बीएचएमएस , नर्सिंग अश्या विवीध अभ्यासक्रमां खातीरी प्रवेश प्रक्रिया सुरू करतले. ताका लागून विद्यार्थी वा पालकांनी काळजी करची न्हय अशें तांणी सांगलें.

आमदार विजय सरदेसाय हांणी पयलीं हो विशय राज्याचे हद्दींत जरी नासलो तरी केंद्रांत भाजप सरकार पेपर फुटी आडावपाक अपेशी थारिल्ल्याचो आरोप केलो. आमदार क्रुझ सिल्वा हांणी केंद्रीय परिक्षा घेनासतना राज्य पांवड्यार परिक्षा घेवपाचो विचार करपाची सुचवणी केली. आमदार चंद्रकांत शेट्ये आनी निलेश काब्रल हांणी विरोधी आमदारांनी हे विशीं बोवाळ करचो न्हय असो सल्लो दिलो.
मुख्यमंत्र्यांनी सांगलें, राज्यांतल्या ११ वी आनी १२ वेच्या विद्यार्थ्यांक नीट तशेंच बोर्डाचे परिक्षे खातीरची तयारी करपा खातीर शिक्षण खात्या वतीन विशेश कोचिंग दितले. हाचो गांवगिर्‍या वाठारांतल्या विद्यार्थ्यांक फायदो जातलो.