भांगरभूंय | प्रतिनिधी
आयतारा 12 केंद्रांनी जातली परिक्षा
भांगरभूंय । प्रतिनिधी
पणजी : आयतारा गोंयांत जावपी नीट परिक्षे खातीर परिक्षा केंद्रांनी सीसीटीव्ही कॅमेऱ्यां सयत मोबायल जॅमर्स बसयतले. प्रस्नपत्रिका हाडप तशेंच पेपर सोंपल्या उपरांन उत्तर पत्रिका पावोपा खातीर पुलिसां सयत सीआयएसएफ जवानांची लेगीत मजत घेतले. खर सुरक्षा वेवस्थेंत परिक्षा जातली, अशी म्हायती उत्तर गोंयचे जिल्होधिकारी अंकीत यादव हांणी दिली.
वैजकी, दंत, आयुर्वेदिक तशेंच हेर वैजकी अभ्यासक्रम प्रवेशा खातीर जावपी नीट परिक्षा हेर राज्यां सयत गोंयांत आयतारा 21 जुनाक जातली. सर्वोच्च न्यायालय तशेंच एनटीएच्या मार्गदर्शक तत्वां प्रमाण खर सुरक्षा वेवस्था परिक्षा केंद्रांनी आसतली. जिल्होधिकाऱ्यां वरवीं परिक्षे खातीरची वेवस्था तशेंच सुरक्षेचो नियाळ घेवप सुरू आसा.
उत्तर गोंयांत 8 जाल्यार दक्षीण गोंयांत 4 मेळून 12 केंद्रांनी परिक्षा जातली. उत्तर गोंयांत चड उमेदवार आशिल्ल्यान परिक्षेची केंद्रां चड आसात. उत्तर गोंयांत 8 परिक्षा केंद्रांनी मेळून 3350 विद्यार्थी परिक्षेक बसतले. दक्षिण गोंयात 4 केंद्रानी 1070 विद्यार्थी परीक्षेक बसतले. पुराय गोंयांत 4500 विद्यार्थी नीट परिक्षेक बसतले. वैजकी, दंत, आयुर्वेदिक, नर्सींग, होमीओपथी ह्या अभ्यासक्रमा खातीर नीट परिक्षेच्या गुणांचेर प्रवेश दितात. विद्यार्थ्यां खातीर कदंबा बशीची खास वेवस्था केल्या. हाका लागून वेळेंत पावप विद्यार्थ्यांक शक्य जातलें.
फाटल्या वेळार नीट परिक्षेचे पेपर फुटिल्ल्यान ही फेरपरिक्षा जाता. पेपर फुटी वा हेर गैरप्रकार जावचे न्हंय म्हूण खर वेवस्था प्रशासनान केल्या.
परिक्षा केंद्रांनी सीसीटीव्ही कॅमेरे आसतले. तशेंच मोबायल जॅमर्स आसतले. हाका लागून परिक्षेक बसपी विद्यार्थी वा थंयच्या कर्मचाऱ्यांक मोबायलाचेर संपर्क सादपाक मेळचो ना. प्रस्नपत्रिका, उत्तरपत्रिकांची हाताळणी सीआयएसएफ जवानांच्या देखरेखी खाला जातली. सुपरवायजर, एक्झाम कंडक्टर तशेंच हेर कर्मचाऱ्यांच्या वेव्हारांचेर नदर आसतली.
उत्तर गोंयांत सेंट झेवियर (म्हापशें), सोहिरोबानाथ आंबिये म्हाविद्यालय (पेडणें), सरकारी म्हाविद्यालय (सांखळे), रोजरी हायस्कूल (कुजिरा), मुश्टीफंड हायस्कूल (कुजिरा), धेंपो हायरसेकंडरी (कुजिरा), केंद्रीय विद्यालय (आयएनएस मांडवी), केंद्रीय विद्यालय (बांबोळे). दक्षीण गोंयांत केंद्रीय विद्यालय (कुर्टी फोंडें), एनआयटी (कुंकळ्ळी), केंद्रीय विद्यालय 1 (वर्णापुरी), केंद्रीय विद्यालय 2 (मांगोरहील) ह्या थळांचेर परिक्षा जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
