भांगरभूंय | प्रतिनिधी
मडगांव, प्रतिनिधी: ‘विकसित भारत रॅली’ खाला कदंब बसस्टॅण्डाच्या वाठारांत प्रधानमंत्री नरेंद्र मोदी हांची बसका जाल्ली. ताका लागून सुमार १०२ कोटी रुपयांचो खर्च विवीध विकासकामांचेर केला. मंडप आनी कॅटरींगाचो खर्च हातूंत ना. निविदा काडले बगर केल्ल्या ह्या खर्चा विशीं खोलायेन चवकशी करची, अशी मागणी कॉंग्रेस फुडारी साविओ कुतिन्हो हांणी आयज केली.
मडगांवच्या दक्षीण गोंय जिल्हो कॉंग्रेस कार्यालयांत घेतिल्ले पत्रकार परिशदेंत कॉंग्रेस फुडारी साविओ कुतिन्हो हांणी विकसीत भारत रॅली खातीर आयोजीत कार्यावळी वेळार हेलिपॅड उभारपा सयत कदंब बसस्टॅण्ड दुरुस्ती, कदंब वाठाराची उदरगत अशा कामां खातीर १०२ कोटींचो खर्च नॉमिनेशन बेसिसचेर केला. ह्या सगळ्या खर्चाचो योग्य वापर जालो? हाची खोलायेन चवकशी करपाची मागणी साविओ हांणी केली.
‘विकसित भारत रॅली’ वेळार हॅलिपॅड उबारपाक ५२.६३ लाखांचो खर्च, कदंब बसस्टॅण्ड वाठाराचे उदरगती खातीर ७०.८४ लाख, एसजीपीडीए मैदानाची उदरगत करप आनी हॉटमिक्सींग ९.३४ कोटी, कदंब वाठार, डेपो वाठार हॉटमिक्सिंगा खातीर ६.३८ कोटींचो खर्च केला. मात, ह्याच ठेकेदाराक हॉटमिक्सींग कामा खातीर ७० लाखांचें काम ह्यान पयलीं दिल्लें, अशेंय सावियो हांणी सांगलें. तशेंच कदंब बसस्टॅण्डाचेर पत्रे घालप आनी हेर दुरुस्ती खातीर ३१.७ लाखांचो खर्च, जिल्होधिकारी कार्यालय ते आर्लेम सर्कला मेरेन हॉटमिक्सिंग कामां खातीर ५.३५ कोटींचो खर्च केला.
आदीं राष्ट्रीय खेळां सर्ती खातीर प्रधानमंत्री नरेंद्र मोदी येवपाचे आशिल्ले तेन्ना हांतलीं जायतीं कामां केल्ल्यान ते खातीर १० कोटींचो खर्च केला. ताका लागून आतां परत तींच कामां करपाचीं आसात हें दाखयलां, अशेंय तांणी सांगलें.
तशेंच कदंब बसस्टॅण्ड तात्पुरतो तयार करपा खातीर मातयेचो भर घालून उदरगतीच्या कामांक ४६.९२ लाखांचो खर्च, जाल्यार मंडप आनी हेर सुविधायां खातीर ४१.३२ लाखांचो खर्च केल्ल्याचें सांगलें. जंय बसस्टॅण्डाची शेड केली ते सुवातेर राष्ट्रीय खेळां सर्ती वेळार पार्कींग वाठार आशिल्लो. ताका लागून माती आदींच उडयल्ल्यांचें निश्चीत आसा. कामां करतना रस्तो मेजप वा हेर कामांची मापां उपलब्ध ना, अशी म्हायती मेळ्ळ्या. ह्या सगळ्या कामां खातीर १०० कोटींच्या खर्चाक परवानगी दिवपाची टिपणी बांधकाम खात्यान २७ फेब्रुवारीचे मंत्रिमंडळाचे बसकेंत केल्ली, ती मंजुरूय जाल्या दिसता. ह्या सगळ्या कामांची चवकशी जावची आनी खर्यांनीच केला काय ना ताची जाप जनतेक मेळची अशी मागणी साविओ कुतिन्हो हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
