भांगरभूंय | प्रतिनिधी
पटियाला: मंगळारा पंजाबच्या पटियाला हांगा निळ्या ड्रमान एके तरणाटेची कूड सांपडली. हो ड्रम रेल्वे कॉलनींत पडिल्लो. खून करप्यान कूड ड्रमांत घातिल्ली आनी ताचे वयल्यान तांबड्या रंगाचें धाकणें लायिल्लें. हाका लागून कोणाकूच दुबाव येचो न्हय म्हूण. हे विशीं म्हायती मेळटांच पुलिसांचो पंगड घडणुके सुवातेर पावलो.
मरण आयिल्ले तरणाटेच्या एका हाताचेर ‘नेहा’ अशें बरयलां. जाल्यार दुसर्या हाताचेर काळजाचो टॅटू आसा. ह्या हार्ट शेपींत ‘एन’ आनी ‘ए’ बरयलां. तरणाटेच्या मुखामळार बारीक जखमोय आसात. तिची कूड राजिंद्रा हॉस्पिटलांत धाडल्या. पुलीस तरणाटेची वळख पटोवपाचो यत्न करता.
लुधियाना डीसीडब्ल्यू रोड उड्डाणपुला लागसार आशिल्ले कोयराचे राशिचेर एका प्लास्टिकाच्या ड्रमांत एके तरणाटेची कूड दुबावीत अवस्थेंत सांपडली. एएसआय गुरविंदर सिंग हांणी सांगलें, मंगळारा सकाळीं सुमार सव्वा पांचांक कोयर एकठांय करपी मनशान ड्रम उगडून तपासलें तेन्ना त्या ड्रमांत तरणाटेची कूड सांपडली. हे विशीं तांणी पुलिसांक म्हायती दिली. पुलिसांनी घडणुके सुवातेर वचून कूड ताब्यांत घेतली.
खून केल्ल्याचो दुबाव
पुलिसांनी उक्तायल्ल्या दुबावा प्रमाण, तरणाटेचो खून दुसरे सुवातेर केला आसतलो आनी उपरांत पुरावे नश्ट करपाच्या हेतान तरणाटेचे कुडीचो विलो लावपाचो कट रचला आसतलो. आरोपींनी ड्रम रेल्वे कॉलनी लागसारा हाडून उडयलें. कूड खंयच्या वाहनान थंय हाडली आनी हे घडणुकेंत कितल्या लोकांचो आसपाव आसा, हाचो सोद पुलीस घेतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
