भांगरभूंय | प्रतिनिधी
भारत आनी ऑस्ट्रेलिया ह्या पंगडां मदीं आयज दुसरी वन डे मॅच जातली. तीन मॅचींचे माळेंत भारत 1-0 असो मुखार आसा. मुंबयच्या वानखेडे स्टेडियमाचेर जाल्ली मॅच भारतान 5 विकेटींनी जिखिल्ली.
सदचो मुखेली रोहित शर्मा पुनरागमन करतलो. मुंबय जाल्ले पयले मॅचींत कांय कुटुबीक कारणाक लागून खेळूंक नाशिल्लो.
वानखेडे स्टेडियमाचेर ऑस्ट्रेलियेक उण्या स्कोराचे मॅचींत भारतान 5 विकेटींनी जैत जोडिल्लें. लोकेश राहुलान नाबाद 75 धांवड्यांची संयमी खेळी केल्ली, ताका रवींद्र जडेजान बरी साथ दिल्ली. ताणें नाबाद 45 धांवड्यांची खेळी केल्ली. तशेंच 46 धांवड्यो दिवन 2 विकेटी घेतिल्ल्यो. ताका लागून जडेजाची मॅन ऑफ द मॅच पुरस्कारा खातीर निवड जाल्ली.
वर्साचे अखेरेक भारतांत संवसारीक वन डे क्रिकेट सर्त जावपाची आसा आनी लोकेश राहुल तशेंच जडेजा पंगडा खातीर म्हत्वाचे खेळगडे आसात. तीन वन डे मॅचींची माळ दोगांयचे प्रगितीची समिक्षा करपाक निवड समितीक मजत मेळटली.
मजगतीं, भारत आयची मॅच जिखून 2-0 अशी निर्णायक आघाडी घेवपाक इत्सूक आसतलो आनी बॅटिंगेंत लेगीत सुदारणां करपाक भारत इत्सूक आसतलो.
पयले वन डे मॅचींत भारतान एका वेळार 39 धांवड्यांचेर चार विकेटी वगडायिल्ल्यो आनी उपरांत स्कोर 5 बाद 83 असो जाल्लो. ते उपरांत राहुल आनी जडेजा हांणी मेळून भारताक जैत मेळोवन दिवपाक मोलादीक भागिदारी केल्ली.
मुखेली रोहित शर्माच्या पुनरागमनान निश्चीत रुपान टॉप ऑर्डरीक घटसाण मेळटली. मिशेल स्टार्काच्या वेगा मुखार आनी वॅरिएशना मुखार भारताचो टॉप ऑर्डर कोसळिल्लो. मार्कस स्टोयनीसान इशान किशनाक बाद केल्या उपरांत स्टार्कान तीन विकेटी घेतिल्ल्यो, ताका लागून भारत चेपणा खाला आयिल्लो.
विराट कोहली (4), सुर्यकुमार यादव (0) आनी शुभमन गिल (20) हे व्हड खेळी करपाक अपेशी थारिल्ले. उरिल्ल्या दोन मॅचींनी भारत बरें प्रदर्शन करपाक इत्सूक आसतलो. संवसारीक वन डे क्रिकेट सर्ती पयलीं घरच्या वातावारणांत बरो अभ्यास करपाचे दिश्टीन भारताक फुडारांत जावपी सगल्यो मॅची म्हत्वाच्यो आसात.
रोहित निमाण्या इकरांत सुवात मेळोवपाचो आशिल्ल्यान इशान किशनाक आयचे मॅचींत भायर बसचें पडटलें. कोहली आनी गिल हांणी पयले मॅचींत उण्यो धांवड्यो केल्यो म्हणून तांकां चड हुस्को करपाची तशी गरज ना. पूण, सुर्यकुमार यादव वन डे क्रिकेटींत लय मेळोवपाक अपेशी थारत आसा. हो हुस्को करपा सारको विशय थारुये. जखमी श्रेयस अय्यर केन्ना पुनरागमन करतलो हें अजून निश्चीत ना. ताका लागून चवथे सुवाते खातीर सुर्यकुमार यादव सध्या तरी कायम आसा.
भारताच्या बॉलरांनी पयले मॅचींत उत्कृश्ट प्रदर्शन केल्लें. फास्ट बॉलरांक मजत करपी खेळपट्टीचेर मोहम्मद शमी आनी मोहम्मद सिराज हांणी जबरदस्त प्रदर्शन केल्लें. पूण, चायनामॅन कुलदीप यादवाक आपलो ठसो उमठोवपाक जमूंक नाशिल्लो. तरी पूण, बॉलिंग विभागांत पंगड वेवस्थापन बदल करतलो अशे दिसना. हार्दिक पांड्या तिसरो फास्ट बॉलराची भुमिका वठयतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.