निरोगी बायलेक गरज सदृड मनाची

तीन मिराबेल भयणी

भांगरभूंय | प्रतिनिधी

नोव्हेंबर 25 हो दीस आंतरराष्ट्रीय महिला हिंसा निर्मुलन दीस म्हण मनयतात. ह्या दिसा राफेल ह्या हुकुमशहाच्या विरोधांत लढपी तीन मिराबेल भयणींच्या हत्येची याद करतात. आयज मनशा कडेन पयसो, शिक्षण, सूख सुविधा सगळें पांयां कडेन आसात, तरी लेगीत आयज बायलां वयले अत्याचार मात लेगीत कमी जावंक नात. असो एकूय दीस वचना जेन्ना दिसाळें, समाज माध्यमां आनी हेर कडेन बायलांचेर हिंसा जाल्या, अशी बातमी येना. आयज घडये अत्याचाराची तरा बदलल्या आसत. पयलीं मार, बडय, जळय, घरा भायर घाल अशे कांय थरावीक हिंसेचे प्रकार दिसताले. पूण आयज, ह्या अत्याचारांनी आनीक वेगवेगळ्या हिंसक पद्दतींची भर पडल्या.
घोव सोरो पियेवन येवन मारता तें सगळ्यांक दिसता. माय सुनेक, सून मायक, नणंद भावजयेक वा उलटें, घरांतले हेर आनी बायल अशे साबार तरेचे आनी वेगवेगळ्या खोलायेचे त्रास बायलेक जातात. पूण हें दिश्टी पडटात तें. त्यानभायर दिश्टी पडनात ते त्रास खूब आसतात. ताचे प्रकार भरपूर वाडल्यात. ताची खोलाय आनी फुडलो परिणाम क्वचीत कोणाच्या लक्षांत येता.
भौतेक घरांनी कळटा न कळटा ही हिंसा कमी जास्त प्रमाणांत जाता. कामाक वचपी बायलेक घर आनी काम दोनूय सांबाळचें पडटा. हें करताना तिची बरीच कसरत जाता. आनी सगळें सारकें जावंक ना जाल्यार ती स्वताक खेपता. आपुणूच चुकता अशी भावना तिचे भितर येता. घरचीं सुद्दा तशेच नदरेंतल्यान आपल्याक पळयतात अशें तिका दिसता. हें अशें दिसता हातूंत तिची चूक म्हणूं नजो. तिका असो विचार करपाक लावपी हो समाजूच आसा. ज्या समाजांत ती व्हड जाता त्या समाजांत पावला कणकणीं तिका हीच तर जाणीव करून दितात. बायल ही दुय्यम. घरचें सगळें काम तिणेंच करपाक जाय. मागीर ती कामाक वचूं वा घरा आसूं. दादलो कामाक वचूं वा घरा आसूं, ताणें घरकाम तर करपच न्ही. केलें जाल्यार हांव तुका मदत करतां, तुजेर उपकार करतां ही भावना. ताचीय तशी भावना ना जाल्यार शेजारी वा सोयरीं तरीं तें सांगतलीं. दोगांय आनी घरचीं लेगीत सुशिक्षीत आसलीं म्हण कामाचें, जबाबदारेचें, योग्य नियोजन नासता. ताका लागून बायलेचेर ताण येता.
कामाक न वचपी, जांव गाडी चलोवपाक येना तांकांय वेगळे थोमणे आयकुचे पडटात. शिवाय घर सांबाळटा तांकां स्वताकूय आपूण आनी कांयच करिना ही भावना आसता. कामाक वता तांकांय कामाच्या जाग्यार सगळें सारकें आसतलेंच हें सांगपाक जायना. चार कडल्यान आयिल्ले चार लोक. भितर भायर थोमणे आयकत तोंड धांपून वा केन्ना केन्ना उगडून तिका जगचें पडटा. तोंड धांपून सोंसता ती बरी. तोंड उगडटा ती वाचाळ. सुबेज. हें समीकरण घरांत आनी कार्यालयांत दोनूय कडेन आसाच.
सरभोंवतणच्या मनशान कितलेंय वायट वागल्यार जाता. तें वग्गी रावन सोंसप म्हणजे आदर्श बायल, आनी हीच आमची संस्कृती म्हण मनार पिळग्यान पिळग्यो कोरायलां. ‘तें तशें वागतात’ म्हण तोंड उगडपी बायल मात वाचाळ, चंचल आनी चारित्र्यहीन. हें चारित्र्य आनी एक कवचेचें आयदान करून उडयलां. तें सांबाळपाची जापसालदारकी बायलेचीच. दादल्यान कितल्याय पयशांचो घोटाळो केल्यार जाता, खंय शेण खाल्ल्यार जाता, ताची इज्जत मात लेगीत कमी जायना. तो सामको हड्डें फुडें काडून समाजांत वावुरता. हो समाज म्हण असोच. दादल्यांच्या फावरार. बायलां ही मुखेल घटक आसुनूय हें चित्र.
बायलेचेर अत्याचार वा हिंसा करपी दादलो वा बायल हांचे मेंदू भगवे हरवे वा धवे नासतात. ते विकृत आसतात. तांकां हे रंग दिवन आमी स्वताकूच फटयतात. ही हिंसा बायलेचेर खंयच्याय धर्मान, खंयच्याय जातींत, खंयच्याय अर्थीक पातळी वयल्या, शिक्षणाच्या पातळी वयल्या घरान जाता. ताका विशिश्ठ वाठार आनी जाती धर्माचें बंधन लागना. अत्याचार करपी विकृत मेंदूची जात एकूच आसता. त्या विकृतांक बायल म्हणजे आपलो राग काडपाची जागा दिसता. हक्काची जागा दिसता. तिचेर शेक गाजयल्या बगर आपली मर्दानगी सिद्द जायना असो कितें तरी दुबाव तांकां आसता. हें पावर पॉलिटिक्स. हांव तुजे परस पावरफूल हें दाखोवपाची धडपड. हे प्रक्रियेंत बायलेक आजिवन सोंसचें पडटा. घोवा पासून तें चल्या मेरेन आवय म्हणजे राग काडपाचें हक्काचें ठिकाण.
समाज माध्यमांचेर ट्रोल करप ही सुद्दा एके तरेची हिंसाच. तिका बुरशो बुरशो गाळी संवप, तिका धमकी दिवप, तिच्या चारित्र्याक जाणा जावन कलंकीत करप, जें जें समाजान लजेक घालपी आसा, तें करप ही एक मोठी विकृत मनशांची चाल. तिच्या मुद्द्यांचेर वक्तव्याचेर योग्य उत्तर येना जालें काय तिका ट्रोल करून तिचें खच्चीकरण करप. भौशीक पद्दतीन तिची पावणी करप ही हिंसेची घाव न घालता रक्तबंबाळ करून उडोवपी हीन दर्जाची छळणूक आसा.
ह्या सगळ्या चेपणांक लागून बायलेचेर प्रचंड ताण पडटा. ताचे परिणाम झट करून दिश्टी पडनात पूण मुखार वचून ताचो परिणाम तिचे भलायकेचेर आनी घराच्या भलायकेचेर पडटा. आमच्या शारिरीक दुखण्याचो आनी मानसीक दुखण्याचो घनिश्ट संबंद आसा. जो मेरेन सदृड मन तयार जायना तो मेरेन निरोगी बायल, चली तयार जावची ना.

नमन धावस्कार सावंत
9765031800