भांगरभूंय | प्रतिनिधी
भांगरभूंय । प्रतिनिधी
म्हापशेंः पर्वरी हांगच्या कामाक्षी उड्डापनोव (30) हे तरणाटेच्या खून प्रकरणातलो दुबावीत निरूपडी शंकरप्पा कडकाल (सुकूर) हाणे ह्या प्रकरणांत दोशमुक्त करपा खातीर अर्ज सत्र न्यायाधीश शेरीन पॉल हांणी भायर मारलो. कामाक्षी हिच्या खूना कडेन आपलो कसलोच संबंद ना आनी आरोपपत्रां ते संदर्भांत कसलोच पुरावो ना. तशेंच महाराष्ट्रांतल्या आंबोली घाटांत कुडीचो विलो लावपाचो आनी पुरावो ना करपांत आपली कसलीच सक्रिय भूमिका ना. ताका लागून ह्या प्रकरणांतल्यान आपल्याक दोश मुक्त करचें अशी मागणी करपी अर्ज भारतीय दंड संहितेच्या कलम 277 खाला कडकाल हांणे न्यायालयांत केल्लो.
दुबावीत फकीर ऊर्फ प्रकाश चुंचवाड हाणे कामाक्षीचो खून केलो उपरांत निरूपडी कडकाल हाचे मजतीन कूड आंबोली व्हरून तिचो विलो लायलो. शिवाय घडणुकेच्या दिसा कडकाल व्हो आपलो पूत दुबावीत प्रकाश हाच्या वांगडा आशिल्लो असो कबुली जबाब दुवाविताचे आवयन दिला. ताका लागून खून आनी खुनाचो पुरोवा ना करपाक कडकाल हाचो हात आसा हे सिद्ध जाता अशें सरकारी वकिलान न्यायालयाक सांगले. तो मानून घेवन न्यायालयान कडकार हाचो अर्ज भायर मारलो.
हे खूनाचें प्रकरण पोरूं 30 सप्टेबरांक घडिल्लें. 31 सप्टेंबराक पर्वरी पुलिसांनी कामाक्षी हिचो पयलींचो मोगी प्रकाश आनी 1 ऑक्टोबराक निरूपडी कडकाल हाका अटक केल्ली. तांकां आंबोली व्हरून कामाक्षीची कूड सोदून काडल्ली.
मोगाचे संबंद तोडले आनी 1 लाखाचो मोबायल तोडून आपल्या आड म्हापशें पुलीस स्टेशनात कागाळ केली ह्या तिडकीन प्रकाश चुंचवाड हांणे कामाक्षीचेर सुऱ्याचे विसां परस चड घाय करून तिका मारून वडयल्लें. पर्वरी पुलिसांनी 1 डिसेंबर 2023 दिसा दोनूय दुबावितां आड 600 पानाचें आरोपपत्र सादर केल्लें आनी 51 साक्षिदाराची साक्ष नोंद केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
