भांगरभूंय | प्रतिनिधी
खबरां संस्था
बंगळुरूः पांच टी-20 मॅचींचे माळेंत कसलेंच निर्णायक म्हत्व नाशिल्ले पांचवे आनी निमणे टी-20 मॅचींत लेगीत ऑस्ट्रेलियेक 6 धांवड्यांनी भारता कडल्यान हार खावची पडली. भारतान ही माळ 4-1 अशी माळ जिखून वन-डे फायनलींत ऑस्ट्रेलियेन मेळयल्लें जैत हे फ्लूक अशें दाखोवन दिले. भारताच्या 160 धांवड्यांत जाप दितना जैताचे वाटेर आशिल्ल्या ऑस्ट्रेलियन पंगडान निमाणे 6 धांवड्यांनी हार खावची पडली.
मुकेश कुमार (3 विकेटी), फास्ट बॉलर अर्शदीप सिंग (2 विकेटी) आनी स्पीनर रवी बिष्णोय (2 विकेटी) हांका भारताच्या ह्या जैताचें स्र्य दिवपाक जाय. 55 धांवड्यांत तीन खेळगडे आवट जाल्या उपरांत टीम डेव्हीडा वांगडा बेन मॅकडेमोट ( 54) हाणे चवथे विकेटी खातीर 49 धावंड्याची भागिदारी करून पंगडाच्या जैताची आस्त तयार केल्ली. अक्षर पटेलान टीम डेव्हिडाक कॅच आवट करून ही जोडी फोडली. मॅथ्यू शॉर्ट (16), कॅप्टन मॅथ्यू वेडान 15 बॉलांत 4 चौक्यांनी 22 धांवड्यो करून पंगडाक जैत मेळोवन दिवपाचो यत्न केलो. मात बाकीचे तीन खेळगडे आयले आनी गेले आनी निमणे मॅचीत जैत मेळोवपाची आस्ट्रलियेची आस्त सोपली आनी 6 धांवड्यांनी तांका हार खावची पडली.
भारताच्यो 160 धांवड्यो
चिन्नास्वामी स्टेडियमाचे खेळपट्टेर ऑस्ट्रेलियेचो कॅप्टन मॅथ्यू वेडान टॉस जिखून फिल्डिंग करपाचो निर्णय घेतलो आनी भारतीय पंगडान अशें तशें करून 20 ओव्हरींत 8 गडी 160 धांवड्यो केल्यो. 33 धांवड्यांचेर यशस्वी जयस्वाल आनी ऋतुराज गायकवाड हांच्यो विकेटी पडल्या उपरांत खेळपाक आयिल्ल्या श्रेयस अय्यरान 37 धांवड्यांत 5 चौके आनी 2 सक्यांनी केल्लो (53) अर्द शेंकडो तशेंच विकेटकीपर जितेश शर्मान 16 बॉलांत केल्ल्यो 24 धांवड्यो आनी अक्षर पटेलान केल्ल्या 31 धांवड्याक लागून भारतीय पंगड देडशे धांवड्यां मेरेन पावपाक शकलो.
यशस्वी जयस्वाल (33), ऋतुराज गायकवाड (10), कॅप्टन सूर्यकुमार यादव (5), रिंकू सिंग (6) हे पंगडाच्या 55 धांवड्यांत पॅव्हेलियनांत परत गेल्या उपरांत जितेश शर्मा (24)आनी अक्षर पटेलान (31) पंगडाची लज राखली. श्रेयस अय्यरान अक्षर पटेला वांगडा सव्वे विकेटी खातीर 46 धांवड्यांची भागिदारी केली म्हणून भारताच्या नांवर 160 धांवड्यो लागपाक शकल्यो. ऑस्ट्रेलियाचो बेडेनड्राफान 38 धांवड्यांत 2 आनी ड्रावरशुस हाणे 30 धांवड्यांत 2 विकेटी घेतल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
