भांगरभूंय | प्रतिनिधी
वाळपय, प्रतिनिधी : गोंय -बेळगांवां मजगतींच्या चोर्ला मार्गांत कर्नाटक हद्दींत येवपी सामकी बाबत अवस्था जाल्ल्या रस्त्यांचें दुरुस्ती काम हातांत घेतलां. ह्या रस्त्याचेर दोन कडेन व्हडा प्रमाणांत फोंडकुलां पडिल्लीं. तीं सध्या पुरयल्यांत. ताका लागून सध्या हो मार्ग येरादारी खातीर समाधानी थारिल्ल्याची म्हायती उपलब्ध जाल्या.
हे विशींची म्हयती अशी, गोंय- बेळगांव मजगतींच्या चोर्ला मार्गा वयल्यान गोंयची हद्द सोंपल्या उपरांतच्या रस्त्याची अवस्था सामकी बाबत जाल्ली. हांगा खुबश्या सुवातांचेर गोंयची शीम ते कणकुंबी ह्या मजगतींच्या दोन सुवातांचेर व्हडलीं फोंडकुलां पडिल्लीं. ह्या फोंडकुलांनी जायते फावट वाहनां रोमून उरिल्लीं. ह्या फोंडकुलांनी उदक भरिल्ल्यान वाहनां मुखार धोको निर्माण जाल्लो.
हे विशीं थळाव्यांनी तिडक उक्तायल्या उपरांत कर्नाटक सरकारान ह्या रस्त्याचे दुरुस्तीचें काम हातांत घेतलें.
दोन दिसां आदीं जंय फोंडकुलां पडिल्लीं थंय फातर आनी खडी घालून ते पुरयल्ले. ताका लागून सध्या मेरेन धोको निर्माण जावंक नाशिल्लो. मात ह्या रस्त्याचेर जायते कडेन डांबरीकरण करपाची गरज आसा. कणकुंबी गांवां पसून जांबळी मेरेनच्या रस्त्याचें डांबरीकरण केलां. ताका लागून रस्त्यार पडिल्ल्या फोंडकुलां पसून वाहन चालकांची सुटका जाल्या.
गोंय-बेळगांव मेरेनचो चोर्ला मार्ग हो उण्या अंतराचो आशिल्ल्यान हांगच्या व्हडा प्रमाणांत येरादारी यो-वच करतात. मात ह्या सरस्त्याची अवस्था सामकी वायट आशिल्ल्या वाहनचालकांक आनी प्रवाशांक बरेच त्रास सोंसचे पडटाले. आतां ह्या रस्त्याची दुरुस्ती केल्ल्यान वाहन चालकांक आनी प्रवाशांक सुशेगाद बेळगांवां, गोंयां यो-वच करपाक मेळटली.
मजगतीं, हो रस्तो दुरुस्त केल्ल्यान हांगच्यान यो-वच करपी प्रवाशांनी, वाहन चालकांनी समाधान उक्तायलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
