भांगरभूंय | प्रतिनिधी
फोंडें, प्रतिनिधी : किर्लपाल- दाबाळचे सचीव फाटल्या १५ दिसां सावन दुयेंत आशिल्ल्यान पंचायतींत हजर रावंक नात. देखून ग्रामस्थांनी तिडक उक्तायिल्ली. हे विशींची बातमी खबरां पत्रांनी येताच पंचायत मंत्र्यांनी ताची रोखडीच दखल घेवन हे सुवातेर नव्या सचिवाची नियुक्ती केली. आयज नवे सचीव होनाजी मोरजकार हे पंचायतघरांत हाजीर रावन पदाचो ताबो घेतलो.
मजगतीं, किर्लपाल-दाबाळचे सचीव दुयेंत आशिल्ल्यान फाटल्या १५ दिसां सावन ते कचेरेंत येवंक नाशिल्ले. तांचेर हॉस्पिटलांत उपचार सुरू आसात. ते पंचायतींत नाशिल्ल्यान विद्यार्थ्यांक लागपी दाखले मेळोवपाक पालकांक आडखळ जाताली. म्हणून पंचायत मंत्र्यान हाची दखल घेवन हेर सचिवा कडेन कचेरेचो ताबो दिवपाची मागणी लोकांनी केल्ली.
दुयेंत आशिल्ल्या सचिवान आजूनय रजे खातीर अर्ज करूंक ना. ताका लागून हांगा दुसऱ्या सचिवाक धाडूंक नाशिल्लो. धारबांदोडा तालुक्याचे गटविकास अधिकारी रजेर आशिल्ल्यान सध्या फोंडें म्हालांतल्या गटविकास अधिकार्यां कडेन हाचो ताबो दिला. हे विशींची बातमी आयच्या दिसाळ्यांनी येताच पंचायत खात्यान रोखडीच दखल घेतली आनी आयज हे सुवातेर नव्या सचिवाची नियुक्ती केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
