भांगरभूंय | प्रतिनिधी
खबरां संस्था
रावळपिंडीः चवथे टॅस्ट मॅचींत पाकिस्तानाक जैता खातीर 343 धांवड्यो करपाचें इंग्लंडान आव्हान दिल्या उपरांत चवथ्या दिसा खेळ सोंपलो तेन्ना तांणी 2 बाद 80 धांवड्यो केल्ल्यो. इमान उल हक (43) आनी साऊद शकील (24) नाबाद आसात. पाकिस्तानाक निमाण्या पांचव्या दिसा जैता खातीर 263 धांवड्यांची गरज आसा. अब्दुल्ला शफीक (6) आनी कॅप्टन बाबर आझम (4) आवट जाल्यात.
इंग्लंडान चवथ्या दिसा आपलो दुसरो डाव घोशीत केलो. पाकिस्तानाक 343 धांवड्याच्या लक्ष्याचो फाटलाव करपाक पुराय पांचवो दीस आसा. पाकिस्तानाच्या नसीम शाह, मोहम्मद अली, जाहिद महमूद हांणी इंग्लडाचे दरेकी दोन विकेटी घेतल्यो. आगाह सलमानान एक विकेट घेतली. आपल्या दुसऱ्या डावांत इंग्लंडान 7.36 च्या रनरेटान 35.5 ओव्हरींत 7 बाद 264 धांवड्यो करून आपलो डाव घोशीत केलो. तांचे खातीर हॅरी ब्रूकान सगल्यांत चड 65 बॉलांत 87 धांवड्यो केल्यो. त्या भायर ओपनर जॅक क्रॉलीन 50 धांवड्यो केल्यो. बॅट डकॅट आनी बेन स्टोक्स शून्याचेर बाद जाले. जॅक विलेंसान 24 धांवड्यो केल्यो.
इंग्लंडाच्या दुसऱ्या डावांत तांचो आदलो कॅप्टन जो रूटान दाव्या हातांत बॅटींग केली. अशें ताणे पयलेच फावट केलें. स्पीनर जाहिद महमूदचे बॉलिंगेचर ताणे दाव्या हातान बॅटींग केली. तागेल्या 6वे ओव्हरींत ताणे दाव्या हातांत स्वीप शॉट मारलो आनी नसीम शाहान ताची कॅच सोडली. रुटान ताचे पयलीं 50 बॉलांत (52) अर्द शेंकडो पुराय केल्लो. 69 बॉलांत 73 धांवड्यो करून तो आवट जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
