भांगरभूंय | प्रतिनिधी
नांव बदनाम जाल्लीं चार पर्यटन थळां गुगलाचेर सर्च करीत जाल्यार बरेच फावटी गोंयचेंय नांव येता. ही हुस्को करपा सारकी गजाल. हेर पर्यटन थळां मदीं पटाया (थायलॅण्ड), इबिझा (स्पेन), लास वेगास (अमेरिका) हीं नांव झळकतात. हे तीन जागे जुगार, शिंदळकी, सोरो, ड्रग्स, पार्टी, थळाव्यांक त्रास, फटवणूक, गुन्यांवां खातीर कुप्रसिद्ध आसात. तातूंत गोंयचें नांव येवचे ना, हाचे खातीर यत्न करपाक जाय. कारण वयलीं तीनूय थळां आदली कात सोडून नवें रुप घेवपाक लागल्यांत. गोंयानूय आतां दर्यावेळो, देगां वयल्या गजालींचेर ड्रोना वरवीं नदर दवरपाची घोशणा केल्या. बीच व्हिजील अॅप ड्रोन यंत्रणेक जोडटले. पुलीस, पंचायतींनीय ड्रोना परस चड सक्रीय जावंक जाय. कारण दर्यावेळांचेर कोयर, विक्रेते, सोरो- ड्रग्स घेवन मस्ती करपी पर्यटक, भिकारी, खंडणीकार, पर्यटकांक लुटपी ट्वाट्स (दलाल) हांचो उपद्रव वाडला. तो खर पावलां उबारून सोंपोवपाक जाय. फाल्यां कोणें बरें, कुटुंबीक पर्यटनथळ खंयचें तें सर्च केलें जाल्यार पयल्या तिनां मदीं गोंयचें नांव येतलें, इतलीं परिणामकारक पावलां उबारचीं पडटलीं.
पर्यटन म्हणल्यार फक्त थळ पळोवप न्हय, तर ते भुंयेचे संस्कृतायेचो आदर करप. जाणें सैम जपलो, ताणेंच थंयचें रीण फारीक केलें, अशें म्हणू येता. ‘खाओ, पिओ, मजा करो’ जाय, पूण जापसालदारकेन. कारण, पर्यटक येतात आनी वतात, पूण निर्माण जाल्ली प्रतिमा बरींच वर्सां तिगता. गोंयां विशीं गैरसमज आसात, ते असल्याच कांय कारणांक लागून. ड्रोनाक लागून आतां खंय कोयर पडला, ताची म्हायती काॅण्ट्रेक्टराक मेळटली, आनी ट्वाट्सांची पुलिसांक! पूण, तांणी रोखडीच कारवाय करूंक जाय. हिंदी सिनेमांनी सगलें आटोपलें काय खलनायकाक ताब्यांत घेवपाक पुलीस पावतात, तशें दर्यावेळांचेर जावचें न्हय. वेवसायीक, सरकारी यंत्रणांनीय जबाबदारीन वागल्यार बरें जातलें.
गोंयांत पर्यटनाचीं दोन रुपां. दोन टोकांचीं. देवळां, चर्च, खाद्य संस्कृताय, झरे, सैम तर दुसरे वटेन सोरो, ड्रग्स, शिंदळकी, ट्वाट्स, बेकायदेशी पार्ट्यो, फटवणूक. कांय घडणुकांक लागून गोंयची प्रतिमा इबाडटा, हें न्हयकारून चलचें ना. गोंय आतां बाराय म्हयन्यांचें पर्यटन थळ जालां. पूण पर्यटक उणें जाल्यात अशें म्हणटात. थळावे, वेवसायीक हांकां हाची चड म्हायती आसतली. पर्यटन मळा कडेन सबंदीत कांय वेवसायीक चड मोल घेतात, असो आरोप जाता. अनधिकृत वेवसाय, सेवा, बेकायदेशीर पार्ट्यो, रातभर व्हडलो आवाज, नशेंत गाडी चलोवप, भौशीक जाग्यांचेर गोंदळ, ड्रग्सांची विक्री… हें फक्त वेळेरुच घडटा अशें ना, आतां हें भितरल्या वाठारांनीय पावलां. हें करपी चडशे भायले. नांव मात घाणावता गोंयकारांचें! पुलीस, पर्यटन विभाग, थळावें प्रशासन, पर्यटन पुलीस सगले काम करतात, तरीय पर्यटनाचो विस्तार, गर्दी पळयतां वायट गजालींचेर नियंत्रण येवंक ना. हें मान्य करपाक कोणाक उणेंपण वा लज दिसची न्हय!
गोंयांतलें धर्मीक, इतिहासीक, कुटुंबीक, सांस्कृतीक, सैम पर्यटन वाडोवपाचे आनीक यत्न जाय. भलायकी, परिशदो- बसकांचें वेवसायीक पर्यटनूय वाडचें. कांय जाण आपल्या गांवांत शक्य ना, तें गोंयांत करपाचें म्हूण येतात. तांचो भेस पसून हांगा पावतकच बदलता. पर्यटन म्हणल्यार स्वेराचार न्हय, तर तें खोस आनी अणभव हांचो मिलाफ आसचो. तोय बी कोणाक त्रास दिनासतना. पर्यटकांक खास गोंयच्यो चार वस्तू, खाणां व्हरपाक मेळूंक जाय. फक्त ‘आय लव्ह गोवा’ टिशर्ट आनी सोऱ्याचे बाटले पुरतें समाधान नाका. काजुबियो व्हरतात, पूण त्यो गोंयच्यो काय आफ्रिकेच्यो तें कळना! पर्यटकां खातीर आचारसंहिता जाय. दर्यावेळांचेर पुलीस केंद्रां जाय. भोंवती विक्रेत्यांचेर खर कारवाय जाय.
गोंयाक नितळ, सुरक्षीत, संस्कारी पर्यटन मेळत?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
