भांगरभूंय | प्रतिनिधी
मुख्यमंत्र्याची घोशणा
19 डिसेंबराक वितरण
गांवांचे करतले सर्वेक्षण
भांगरभूंय । प्रतिनिधी
पणजी : सरकारा वतीन सगल्या महसुली गांवांचें सर्वेक्षण करतले. प्लास्टीक, कोयर मुक्त तशेंच नितळसाणीचे हेर निकश पुराय करपी गांवाक व्हड रकमेचो पुरस्कार दितले. 19 डिसेंबराक जावपी कार्यावळींत ह्या पुरस्काराचें वितरण करतले, अशी घोशणा मुख्यमंत्री डॉ. प्रमोद सावंत हांणी केली. शेनवारा तांणी ऑनलायन पद्दतीन गोंयांतले पंच, सरपंचां सयत स्वयंपूर्ण मित्रां वांगडा संवाद सादलो. ह्या वेळार तांणी राज्य सरकारा वतीन सुरू केल्ल्या हरीत गोंय नितळ गोंय उपक्रमाची म्हायती दिली.
मुख्यमंत्र्यान सांगलें, गोंयांत रस्त्याचे कुशीक हरीत कॉरिडॉर करचे खातीर आमी यत्न करतात. हे खातीर पत्रादेवी ते पोळे मेरेनच्या राष्ट्रीय म्हामार्गाचे कुशीक झाडांचे रोंपे लायतले.
फुडल्या तीन म्हयन्यांत झाडांचे 10 लाख रोंपे लायतले. रस्त्याचे कुशीक शेती करप्यांनी आपल्या शेतांत झाडां लावचीं. ह्या झाडांची मालकी पुराय तरेन शेतकारांची आसतली. पंचायत, नगरपालिका, शाळा, म्हाविद्यालयांनी आपल्या वाठारांत झाडांचे रोंपे लावपाच्यो मोहिमो हातांत घेवच्यो. तातूंत भौशीक बांदकाम, शेतकी, रानां खात्यांतले अधिकारी मजत करतले, अशें मुख्यमंत्र्यान सांगलें.
झाडांचे रोंपे लायले उपरांत तांची देखभाल आनी उदक घालपाचें काम सरकारा वतीन करतले. महिला बचत गटांनी हें काम हातांत घेतल्यार तांकां वेतन दितले. तीन म्हयन्यां उपरांत ह्या उपक्रमांत बरें काम केल्ल्या पंचायत तशेंच हेर संस्थांक इनामां दितले. लोकांनी वड, पिपळ, अर्जुन अशीं उणी जायत गेल्लें झाडां लावचीं. गोंयाक हरीत करप ही फक्त सरकाराची जापसालदारकी नासून सामुहीक जापसालदारकी आसा. हे खातीर लोकांचो वांटो गरजेचो आसा. कार्यावळीच्या समारोप सुवाळ्याक केंद्रीय मंत्री भुपेंद्र यादव उपस्थीत रावतले, अशें मुख्यमंत्र्यान सांगलें.
रस्त्या कुशीक गाडे उबारचे न्हय
म्हामार्ग वा हेर रस्त्यांचे कुशीक आशिल्ल्या गाड्यांक लागून अपघात वाडटात. ते खातीर लोकांनी अशे गाडे उबे करचे न्हय. थळाव्या स्वराज्य संस्थांनी बिराडकारांचो लेगीत कोयर एकठांय करचो, अशें मुख्यमंत्री डॉ. सावंत हांणी सांगलें.
पंचायतींनी ‘म्हजें घर’चे अर्ज दिवचे
मुख्यमंत्र्यान सगल्या पंचायतींनी म्हजें घर येवजणे खाला विवीध अर्ज उपलब्ध करून दिवपाक सांगलां. अर्ज भरचे खातीर लोकांक मजत करची, अशेंय तांणी सांगलें. येवजणेचो सुमार एक लाख गोंयकारांक फायदो जातलो, अशें तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
