भांगरभूंय | प्रतिनिधी
पायाचीं पन्नाशीं हुपतना चेतनभाई तुका आमच्या इश्ट परिवारा कडल्यान लाख मोलाचीं परबीं.
मनशां भितर आशिल्लें सादेपण हें ताच्या भितर सातत्यान आसपी विचारांचेर आनी वागणुकीचेर आदारून आसता. आपली कोंकणी भास, भौस आनी मातयेचीं मुळां चेतनभाईच्या काळजांत रुजल्यांत. हेरांक चेतनभाई मदल्या जायत्या सभावाची जाण आसतली पूण म्हाका ताचे मदलो सदांच एक सभाव मना पासून आवडटा. तो म्हणल्यार ताचे भितर आशिल्लें निखळ सादेपण. जें सोंपेपणान खूब उण्या जाणां मदीं अणभवपाक मेळटा. पयसो, उच्च पदां, व्हडपण मिरोवपी मनशां आयज आमकां सोशल मिडिया वा वाडट्या तंत्रगिन्यानाक लागून जळामळां पळोवंक मेळटात. अशा ह्या समाजा भितर वावुरतना, कोंकणी भाशा मंडळाची जापसालदारकी भुजार पेलतना वा तरणाट्यां मदीं वावुरतना ताचे मदीं केन्नाच ‘मिपणाची’ भावना नासताली. हेंच ताचे भितर आशिल्लें व्हडपण.
काणकोणचे शिमे लागसारलो आमचो लोलयें गांव. सैमान आपल्या दोनूय हातांनी सदळ दान दिवन पचवेपणान नटिल्लो हो आमचो माणकुलो गांव. ह्याच गांवांत जल्मलो आनी ल्हानाचो व्हड जाल्लो आमचो चेतनभाई. आमच्या गांवच्या पाचव्याचार शेतां धडेर निखळ उदकाचो एक व्हाळ व्हांवचो आनी त्या संथ व्हांवपी व्हाळा कडेन पळयतनाच चेतनभाईची याद येवची इतलें सैमीक सादेपण आनी आपलेपण ताचे मदीं भरून ओंतता.
ताका पर दुख्ख सदांकाळ आपलें दिसता. देखुनूच तो जात, धर्म, देव ह्यो सगळ्यो शिमो हुंपून समाजांतल्या सगळ्या घटकां कडेन आपले समजून समरूप जाता. ताच्या इश्टांचे वळेरेंत एका सान माणकुल्याक धरून जाणट्या कडेन ताचे भावनीक नातें जोडलां. चेतन भाई तुजो निखळ हांसो आमकां सगळ्या संकटांचेर मात करून फुडें सरपाची उमेद दिता. ज्या गांवच्या सैमान तुका घडयलो, ज्या मातयेंत तूं फुल्लो, त्या सैमा कडेनूच म्हजें मागणें, तुजो निखळ हांसो, तुजें सभावाचें सादेपण तुजे भितर तिगून रुजत उरूं आनी तुजे कडल्यान कोंकणी भाशेची आनी मनीसपणाची सेवा सदांकाळ घडत रावूं.
जल्मदिसाचीं खूब खूब आनी खूब परबीं.
गंधाली भट
7721068838
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
