भांगरभूंय | प्रतिनिधी
नवी दिल्ली, खबरां संस्था: आतां मेरेन जायत्या जाणांनी वंवशाक दिवो आनी फकत चलो जाय अश्या विचारांनी आपल्याच धुवांचो जीव घेतला. समाजांत शिक्षणाचो प्रसार जाल्ल्यान चलयांचो जीव वचपाचें प्रमाण उणें जायत आसतना दिल्ली सारक्या व्हडल्या शारांत एका बापायन निकत्याच जल्मल्ल्या जुंवळ्या चलयांक मारून उडोवपाची घडणूक घडली. जुंवळ्यो चलयो जल्माक आयिल्ल्यान अस्वस्थ जाल्ल्या घोवाच्या कुटुंबान ही क्रूर कृती केली हें उजवाडाक आयलां. बापूय आनी कुटुंबांतल्या हेर वांगड्यांनी दोगांय धुवांक आवयचे कुशींतल्यान काडून व्हरून मारून उडयलीं.
पुलिसांक हे विशीं म्हायती मेळ्ळ्या उपरांत कुटुंबाचेर कायदेशीर कारवाय सुरू केल्या. ह्या प्रकरणांत एफआयआर दाखल केला. चलयांची आवय हरियाणांतल्या रोहतकची. २०२२ वर्सा लग्न जाले उपरांत उल्लेख केल्ली बायल आऊटर दिल्लीच्या पूथ कलान वाठारांत आशिल्ल्या घोवा घरा रावपाक आयिल्ली. लग्न जाले उपरांत परत परत हुंड्या खातीर त्रास दितात अशें बायलेन कागाळींत सांगलां. तशेंच चल्याकूच जल्म दिवचो अशेंय चेंपण घालतालीं. तशेंच गुरवार जाले उपरांत तिच्या कुटुंबान गुरवारपणाची चांचणी करपाक चेंपण हाडलें अशें ते बायलेन सांगलें.
बायलेन दोन जुळ्या चलयांक जल्म दिल्या उपरांत तिच्या घोवाच्या कुटुंबान उपचाराच्या नांवान दोगांय चलयांक आवय पसून वेगळीं केलीं. दोगीय चलयो दुबळीं आशिल्ल्यान उपचाराची गरज आसा अशें कुटुंबान सांगलें. पूण बायलेन फुडली चवकशी केल्या उपरांत दोगांय चलयो दुयेंत आशिल्ल्यान तांकां मरण आयलें अशी म्हायती घोवाच्या कुटुंबांतल्यानी तिका दिली.
घोवाच्या कुटुंबियांनी फट मारल्या असो दुबाव येना फुडें तिच्या कुळारच्या लोकांनी पुलिशेंत कागाळ केली. पुलिसांनी उपविभागीय दंडाधिकार्या कडल्यान परवानगी घेवन त्या दोगांय बाळकांक पुरलेले सुवातेरच्यान भायर काडलीं आनी वैजकी चांचण्यो केल्यो. तशेंच हेर कायदेशीर प्रक्रिया सुरू केली. ताचे उपरांत दुबावितांक अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
